Real Hope Say Tomorrow Go Better
You get hope say tomorrow go better? Many people still de hope say tomorrow go better even though say we de face plenty problems today. But we fit really dey sure say things go better? Yes! Because Bible give strong hope say tomorrow go better.
Which hope Bible de give?
Bible show say people for everywhere for this world de face plenty problem. But e still promise say this problems no go worry us forever. Make we talk about some examples.
Problem: Many people no get house to stay
See wetin Bible talk: “Them go build house and stay inside.”—Isaiah 65:21.
How e go take happen for future: People go enjoy the house wey them build.
Problem: Many people no get work and them poor
See wetin Bible talk: “The people wey I choose as my own go really enjoy the work wey them use their hand do.”—Isaiah 65:22.
How e go take happen for future: Everybody go get better work wey them go enjoy and wey them go gain from.
Problem: People de do partial
See wetin Bible talk: “Prince them go rule and them no go do partial.”—Isaiah 32:1.
How e go take happen for future: Them no go do anybody partial again because of where e come from, the kind person wey e be and whether e get money or e no get. Them no go treat anybody bad again.
Problem: Hunger dey and plenty people no get better food to chop
See wetin Bible talk: “Food go plenty for everywhere for the earth, e go plenty sotey e go de troway for ontop mountain.”—Psalms 72:16.
How e go take happen for future: Everybody go see better food chop. And nobody go sleep with empty or suffer because e no see better food chop.
Problem: Fight-fight and bad things wey de happen
See wetin Bible talk: “Each one of them go sitdown, for e own farm and under e own fig tree, and nobody go make them fear.”—Micah 4:4.
How e go take happen for future: Nobody go de fear again, because wicked people no go dey again and na only “righteous people go stay for this earth.”—Psalm 37:10, 29.
Problem: War
See wetin Bible talk: “Country no go carry sword fight other country, and them no go learn war again.”—Isaiah 2:4.
How e go take happen for future: Peace go dey everywhere for this earth. (Psalm 72:7) Nobody go de cry because them kill person wey e love for war or run go hide for another country because of war.
Problem: Sickness and disease
See wetin Bible talk: “Nobody for there go talk say: ‘I de sick.’”—Isaiah 33:24.
How e go take happen for future: People no go ever suffer because them de sick or because part of their body no complete. (Isaiah 35:5, 6) Bible even promise say people “no go die again.”—Revelation 21:4.
Problem: People de spoil the earth
See wetin Bible talk: “Wilderness and dry land go dey glad, and desert go happy and fine like saffron.”—Isaiah 35:1.
How e go take happen for future: The whole earth go turn to Paradise for people to stay, just as God want make e be from the beginning.—Genesis 2:15; Isaiah 45:18.
We fit trust the hope wey Bible de give us?
The truth be say, sometimes e fit hard us to trust the promise for Bible. But we de encourage you to spend time check wetin Bible talk say go happen for future. Why we talk like that? Because the things wey Bible promise really dey different from the promise wey people make. The things wey Bible promise na from God. See why we suppose trust all this promise:
We fit trust God. Bible talk say God “no fit lie.” (Titus 1:2) Another be say, na only God get the power to talk how tomorrow go be. (Isaiah 46:10) Bible get plenty example wey show say wetin God talk de always happen. If you want learn more, watch the video How We Know Say Wetin Bible Talk Na True?
God get power to solve all our problem. Bible talk say God get power to do ‘everything wey e want do.’ (Psalm 135:5, 6) This one mean say nothing fit stop God make e no do wetin e don promise. Another thing be say, God want help us because e love us.—John 3:16.
You fit de feel say, ‘If God want help us and e get the power, why we still de face plenty problem?’ To get the answer to this question, abeg watch the video Why God Leave-am Make Bad Things De Happen?
How the things wey Bible promise go take happen?
God go use im Kingdom make the things wey e promise happen. E don choose Jesus Christ to be King for that Kingdom, and e don give-am power to care for the earth and people for this earth. When Jesus dey for this earth, e cure sick people, give food to people wey de hungry, control bad weather, and even bring people wey don die back to life. (Mark 4:39; 6:41-44; Luke 4:40; John 11:43, 44) All this things show wetin Jesus go do when e start to rule this earth.
To learn more about how you go gain when God Kingdom start to rule, watch the video Wetin Be the God of Kingdom?
Which time e go take happen?
E no go tey again! Why we dey sure say e go happen soon? Because Bible talk about some things wey go de happen wey go help us know say God Kingdom go soon start to rule this earth. (Luke 21:10, 11) The bad things wey de happen for everywhere for this world match the things wey Bible don talk say go happen.
To learn more, read the article “When God Kingdom Go Start to Rule This Earth?”
How the hope wey Bible de give go fit help you?
One person wey write Bible talk say the hope wey Bible de give be “like anchor for our life.” (Hebrews 6:19) Just the way anchor de hold ship make heavy breeze na carry-am lost for sea, na so our hope de help us make life no tire us when we de face serious problem. The hope wey we get fit protect our mind and the way we de feel and e fit even make us dey strong for body.—1 Thessalonians 5:8.
