For May 23, 2023, people wey sabi health matter for United States warn say social media don de affect many young people for bad way.

•   ‘Even though say some children and young people de gain from social media, many other reason dey wey show say social media fit cause plenty problem wey fit affect the health and body of this young people.’​—Social Media and Youth Mental Health: The U.S. Surgeon General’s Advisory, 2023.

 The adviser talk about some research wey explain why this matter suppose concern us.

•   Young people wey de around the age of 12 to 15 ‘wey de spend more than 3 hours for social media everyday, fit face double mental health problem compare to person wey no too de use social media. E fit still de show sign of over worry-worry and depression.’

•   When young people wey dey 14-years ‘too use social media, them no de fit sleep well, people go de talk bad about them for internet, them go dey sad about how their body be, them go de feel say them dey useless, and them go de show sign of depression.’

 How papa and mama fit protect their children from this kind problem? Bible give us some better advice.

 Help your pikin. As papa and mama, think about the danger wey dey social media and decide if your pikin go use-am or e no go use-am.

•   Advice for Bible: “Train pikin to follow the right way.”​—Proverbs 22:6, footnote.

•   To know more, read the article “Should My Child Use Social Media?”

 If you allow your pikin use social media, make sure say you know the danger and wetin them de do for internet. How you fit do this one?

 Protect your pikin from bad things wey dey social media. Teach your pikin how to know and avoid bad things wey dey social media.

•   Advice for Bible: “For among una, make them no even hear about sex wey no clean and different kind of things wey no clean or long throat, . . . or behavior wey de bring shame or foolish talk or rotten joke”​—Ephesians 5:3, 4.

•   See wetin you fit do, read the article “De Teach Your Children How to Use Social Media Well.”

 Set Rules. For example, set rule for when and how long your pikin fit use social media.

•   Advice for Bible: “Make una de really watch how una de live . . . as people wey get sense.”​—Ephesians 5:15, 16.

•   Use the whiteboard cartoon Be Social-Network Smart take help your pikin understand why e de important to set rules for social media.