Wetin them don spend for war and the damage wey war don cause really plenty no be small.

•   “Last year, government for the whole world spend $2.2 trillion for different-different wars wey them fight. This one pass the money wey them don ever spend for wars for other years wey don pass.”​—The Washington Post, February 13, 2024.

 Other damage don happen apart from the big money wey them don spend. Take for example the war for Ukraine:

•   Soldiers. Some experts talk say, since the war start for Ukraine two years ago, them don kill or wound almost 500,000 soldiers.

•   Common people. More than 28,000 people don die or wound according to wetin the United Nations don talk. But one senior UN worker talk say: “We no fit really count the number of people wey this war don affect.” a

 War and fight-fight wey de happen around the world don cause serious suffer for people.

•   114 million. This na the number of people wey war and fight-fight don pursue comot from their house when them count-am for September 2023.

•   783 million. This na the number of people wey serious hunger de affect because of war. “War na the number one cause of hunger, because 70 percent of people wey de hungry well-well for the whole world de live for area wey war and fight-fight de happen.”​—World Food Programme.

 War go fit ever end? Hope dey say peace go ever dey? Them go ever use the things wey the earth de produce to stop hunger and comot poverty finish? Wetin Bible talk?

 Bible don talk say war go full everywhere, and e describe war like person wey sitdown ontop horseback.

•   “Another horse come out, and the color of this horse be like fire, and them give the person wey sitdown ontop-am big sword and power to comot peace from the earth so that people go de kill each other anyhow.”​—Revelation 6:⁠4.

 Two other horse follow this horse for back. One of them represent hunger wey don full everywhere and the other one represent things wey de cause death like serious sickness. (Revelation 6:​5-8) To learn more about this Bible prophecy and why we dey sure say e de happen for this our time, read the article “The Four Horsemen​—Who Are They?”

 Soon, them no go use the riches of the world fight war again. But no be human being go fit do this one. Bible talk say:

•   God go “end all war for the whole earth.”​—Psalm 46:⁠9.

•   God go correct the bad things wey war don cause. “E go clean all the tears comot from their eyes, and death no go dey again, sorrow, cry-cry, and pain no go dey again. The things wey de happen before don go.”​—Revelation 21:⁠4.

•   God go make sure say everybody go enjoy peace forever. “My people go stay for place wey peace dey, for place wey problem no dey and place wey they go get rest of mind.”​—Isaiah 32:⁠18.

 According to Bible prophecy, the wars and other things wey de happen today show say the time wey peace go dey don near.

 How God go bring better future wey peace go dey? E go use im government, or Kingdom wey dey heaven to bring peace. (Matthew 6:10) To learn wetin this Kingdom be and how you go fit gain from-am, watch this short video Wetin Be the Kingdom of God?