For the 2024 Olympic, people wey join do the sport come from 206 country and na about five billion people watch-am for the whole world. Thomas Bach wey be the president of the International Olympic Committee talk say: “Make all of us support this idea wey Olympic de bring say, make we de live together in peace and get one mind even though say we dey different from each other.”

 Olympic go fit make people de live in peace and get one mind? We go fit ever live in peace and get one mind?

 The Olympic for this year no be just about sports. The Olympic don make people really know about how people decide say them want live their life and politics matter wey de divide people. Some of this matter concern the right wey people get to live their life the way them want, to hate people wey come from other place, to talk bad about people religion, and to feel say some people better pass other people.

 Sport like Olympic wey people for the whole world de watch na to make people happy. But the truth be say for this sport, them de show and teach people character wey de make them hate each other, instead of wetin go make them live in peace and get one mind.

 Bible don talk say for this our time, people go get the kind character wey go make-am really hard for them to fit live in peace with each other. (2 Timothy 3:​1-5) To learn more about this thing wey Bible don talk, abeg read the article wey the topic na “Did the Bible Predict the Way People Think and Act Today?”

 Bible give us better hope say people for the whole world go enjoy peace and one mind. E promise say when the government for heaven wey be “the Kingdom of God” go de rule, everybody go live as one.​—Luke 4:43; Matthew 6:⁠10.

 The King of that Kingdom na Jesus Christ and e go make peace dey for the whole world. Bible talk say:

•   “People wey de do the correct thing go plenty, and peace go dey everywhere.”​—Psalm 72:⁠7.

•   ‘E go save the poor people wey de cry for help . . . E go save them from people wey de oppress and suffer them.’​—Psalm 72:​12, 14.

 Even for this our time, the things wey Jesus de teach de help million of people for the whole world to do things together as one. This one don help Jehovah people for the whole world to live in peace with other people. To learn how this one fit dey possible, abeg read the Watchtower wey the title na “Breaking the Cycle of Hatred.”