E never tey wey leaders for the world, science people, and people wey sabi technology talk about the kind power wey things wey them program to do wetin human being de do get. Them agree say e good, but them still de worry say people fit use-am for bad way.

•   “This things wey them program to do wetin human being de do really get power and e fit make life easy for people today . . . But e fit still make us no dey safe, e de go against people right and always want know wetin people de do, and e de make-am hard for people to trust and get faith for government”​—Kamala Harris, vice president of the United States, May 4, 2023.

•   “Even though say this things wey them program to do wetin human being de do fit make matter wey concern health-care better, e fit still cause other problem for human being.” This na wetin one international group of doctors wey be expert for health-care wey Dr. Frederik Federspiel de lead talk for one article wey them publish for May 9, 2023, for BMJ Global Health. a

•   “People fit use this things wey them program to do wetin human being de do take spread lie-lie information. Small time e fit make people lose their work. Some people wey sabi technology really de worry say for future this things wey them program to do wetin human being de do fit put human being for danger”​—The New York Times, May 1, 2023.

 As time de go, e go dey clear whether people go use this things wey them program to do wetin human being de do take do better thing or cause problem for human being. Wetin Bible Talk?

 Bible show why we no fit trust whether the new technology wey human being make go only work for good way.

1.  1. Even when people get good mind, them no fit see the bad thing wey fit come out from wetin them de do.

   •   “E get way wey dey good for person eye, but for the end e de lead to death.”​—Proverbs 14:12.

2.  2. Person no fit control how other people go use or misuse the work wey e don do.

   •   “I must leave [my work] for the person wey de come after me. And who know whether e go dey wise or foolish? But still, e go control all the things wey I don use my power and sense get under the sun.”​—Ecclesiastes 2:18, 19.

 This kind thing wey we no fit control show why we need our Creator to guide us.

 Our Creator don promise say e no go ever allow human being or any technology wey them make destroy this earth or the people wey dey inside.

•   “The earth go remain forever.”​—Ecclesiastes 1:4.

•   “Na righteous people go stay for this earth, and them go stay inside forever.”​—Psalms 37:29.

 Our Creator don use Bible give us the things wey go guide us to fit get better future where we go dey safe and peace go dey. To learn more about wetin Bible talk, read the articles “Is There a Reliable Guide to a Secure Future?” and “A Real Hope for a Better Tomorrow.”