For the whole world, many people want know and do wetin them de call veganism.

•   “Veganism na when people de try everything wey them fit do so that them no go do anything bad to animals, or eat them, use their skin make cloth, or anything at all.”—The Vegan Society.

 Some people wey de follow this kind idea, no de follow-am just because them love animals. But na still because them want make their area better, them want get good health, or because of their religion.

•   “The idea say make people no use animal for anything dey different from when people de dey careful of wetin them de eat. People de see-am as wetin some people believe, or wetin them feel say dey correct, and na way wey them think say them fit make the world better.”—Britannica Academic.

 This kind idea fit make the world better? Wetin Bible talk?

 Bible show say na Jehovah God a make people and animals, and for im eye, people high pass animals. E even give them power to control animals. (Genesis 1:27, 28) As time de go, God allow people to de eat meat from animal. (Genesis 9:3) But, e no want make them de treat animals for bad way.—Proverbs 12:10.

 Bible talk say na everybody go choose by imself whether e go chop meat or e no go chop meat. b No be wetin we choose for this matter go make us be better person for God eye. (1 Corinthians 8:8) Make nobody judge anybody for wetin e decide or choose to eat.—Romans 14:3.

 Bible don let us know say no be the way we choose to live our life go solve the problems for the world. Many of the problems wey dey this world de come from politics, business, and how people de treat each other. And all this things no be wetin human being fit correct. Bible talk say:

•   “Them no fit make something wey don twist straight.”—Ecclesiastes 1:15.

 The person wey make us go solve all our problems. Bible talk wetin God go do.

•   “And I see new heaven and new earth, because the heaven wey dey before and the earth wey dey before don go, and the sea no dey again.”—Revelation 21:1.

 God go remove all human government, wey be “the heaven wey dey before,” and bring “new heaven,” wey be im Kingdom wey dey heaven. Im Kingdom go remove “the earth wey dey before,” wey mean wicked people. And im Kingdom go rule over “new earth,” wey mean people wey want make God rule them.

 Na only when God Kingdom dey rule na im people and animals go fit live in peace and take care of their environment.—Isaiah 11:6-9.