United Nations talk say:

•   From October 7 go reach October 23, 2023, the fight between Gaza and Israel don kill people wey pass 6,400 and injure 15,200 people, and na the common people e affect pass. Another thing be say, this fight don make thousands of people run comot for their house.

•   From when the war start go reach September 24, 2023, the war between Russia and Ukraine don kill 9,701 common people and injure 17,748 for Ukraine.

 Which hope Bible de give people wey de suffer because of war?

 Bible talk say God go “end all war for the whole earth.” (Psalm 46:9) E go use one government for heaven, or kingdom, to replace all the governments wey dey this earth. (Daniel 2:44) Na the Kingdom of God go end the suffer for this world.

 See wetin Jesus Christ, wey be the king of God kingdom, go do:

•   “E go save the poor people wey de cry for help, and e go still save the people wey other people de see as nothing and anybody wey no get who de help-am. E go pity poor people and common people, and e go save their life. E go save them from bad and wicked people.”—Psalm 72:12-14.

 God go use im Kingdom to solve all the problem wey fight-fight and war don cause.

•   “E go clean all the tears comot from their eyes, and death no go dey again, sorrow, cry-cry, and pain no go dey again. The things wey de happen before don go.”—Revelation 21:4.

 E no go tey again before God Kingdom go change things for this earth. Bible don talk about the “war and news about war” wey we de see today. (Matthew 24:6) This one and other things wey de happen show say we de live for the “last days” of human being government.—2 Timothy 3:1.