For the whole world, politics matter de divide plenty countries. For the survey wey Pew Research Center do for 2022, them talk say “65% of people wey mature for 19 countries talk say people wey de support different political party for their country no de agree at all.”

 You don notice for your area say politics matter de separate people more-more? Why e be like this? Any solution dey? See wetin Bible talk.

 Bible don already talk say for this our time, wey be the “last days,” many people go get character wey go make-am hard for people to de do things together.

•   “But know say for last days, serious hard time wey no go dey easy to handle, go dey. People go de love theirself, . . . them no go want get any agreement with people.”​—2 Timothy 3:1-3.

 Even though say many people de work hard make government succeed, this one no really de happen. E de dey hard for people wey get different idea to work together to solve problem, and sometimes them no de fit work together at all. The things wey de happen now de show wetin Bible don already talk for long time.

•   “Man don rule man and bring man plenty pain.”​—Ecclesiastes 8:9.

 The truth be say, Bible don talk about one government wey go solve all this problem. The leader of this government fit remove all the things wey de make people suffer today.

 Bible talk about one leader wey get the power to solve this problem and na Jesus Christ. Jesus get the power and e dey ready to bring people together for the whole world.

•   “For im time, people wey de do the correct thing go plenty, and peace go dey everywhere.”​—Ps. 72:7.

•   “All the nations go serve-am.”​—Ps. 72:11.

 Jesus na the corrrect leader because e de care for people and e really want help the people wey them no de treat well.

•   “E go save the poor people wey de cry for help, and e go still save the people wey other people de see as nothing and anybody wey no get who de help-am. E go pity poor people and common people, and e go save their life. E go save them from bad and wicked people.”​—Psalm 72:12-14.

 Learn more about God Kingdom, the government wey dey heaven wey Jesus de direct. Learn more about how you fit gain from Jesus rule and how you fit support-am.

•   Watch this video Wetin Be the Kingdom of God?

•   Read the article wey the topic na “God’s Kingdom​—A Government With No Corruption.”