For April 7, 2020, Jehovah Witness people for the whole world remember the death of Jesus as Jesus say make we do, even as the coronavirus still de spread. Just as one of the Governing Body member, Brother Stephen Lett talk, “No virus dey, no sickness wey de spread fit make us no value wetin Jehovah and e Son Jesus Christ don do for us or stop us so that we no go fit do the Memorial of the death of Jesus Christ.” So how we do the Memorial this year?

This article na the first from the set of articles wey we go put for our Newsroom about how our brothers for the whole world do the Memorial for this time wey coronavirus de spread. For this first article, we go talk about how we do the Memorial for the world headquarters of Jehovah Witness and for the branch office for United States.

Government don talk say make people stop to gather together, and to obey this law, the Governing Body decide say they go do one Memorial program for the whole Bethel family. Na Brother Anthony Morris give the Memorial talk for the place wey they be de gather for big meeting for Warwick. They give all the Bethel family members chance to watch the program from their different rooms. The Bethel Office give everybody for the family the Memorial bread and wine even though say na only small number of people go chop the bread and drink the wine.

Bethelites still get chance to connect with other brothers and sisters for their congregation with video call and do the Memorial. And they give some Bethelites wey be elders chance to give the Memorial talk with video call.

Plenty people for the Bethel family talk say na this Memorial special pass all the other ones wey they don attend. Na true say they no fit meet together for the same place as we de do before, but they feel the strong love among their brothers and sisters for the whole world as all of us remember the two greatest ways to show love. And na Jehovah and e Son Jesus Christ don show their deep love for us for this two ways.​—John 3:16; Matthew 20:28.