Elijah hear say King Ahab don die. You fit imagine how Elijah go feel? As old man, maybe e begin de rub e beard-beard as e de think. Maybe e want cry, as e start to remember the time wey e de face wicked King Ahab many years ago. Elijah don really suffer plenty things! Ahab and Jezebel, wey be the queen, don try to kill Elijah; they put fear for e body well-well. Jezebel give order make they kill many of Jehovah’s prophet, and the king no do anything to stop-am. Because of long-throat, this husband and wife, Ahab and Jezebel, plan make they kill Naboth and e sons. Naboth dey innocent and righteous. Because of this wicked thing wey they do, Jehovah send Elijah to deliver judgement message to Ahab and people wey go rule after Ahab from e family. Wetin God talk happen? Yes, Ahab die the way Jehovah talk-am.​—1 Kings 18:4; 21:1-26; 22:37, 38; 2 Kings 9:26.

But, Elijah know say e no suppose tire to endure. Jezebel still dey alive, and she no stop to make her family and the nation de put hand for bad things. More problems de wait for Elijah. And even with that one, e still get plenty things to teach Elisha. The two of them na friends, and na Elisha go continue the work after Elijah. So make we talk about three final assignment wey Elijah do. We go see say e fit endure because of e faith. And we go still see how we fit make our faith strong more-more for this time of trouble wey we dey.

Ahaziah na son to Ahab and Jezebel. E rule for Israel that time. Instead make e learn from wetin happen to e papa and mama, e follow their wickedness. (1 Kings 22:52) Ahaziah worship Baal like them. This religion of people wey de worship Baal, make other people do bad things. For example, people begin do prostitute work for temple, and they even de use their children do sacrifice. The people don really soak their hand for bad things. Anything fit make Ahaziah direct the people to fit serve Jehovah well again?

But sad thing happen to this proud young king. E fall from the roof of e house, through one hole, and e wound himself well-well. Na true say e nearly die, but e no still look Jehovah for help. Instead, e send messengers go Ekron make they go find out from one god wey be Baal-zebub, whether e go well again. Ekron na city for Philistine, enemy of Israel. Ahaziah cup don really full, because Jehovah no happy at all for this thing wey e do. So God send angel to prophet Elijah make e stop the messengers. Elijah come tell them one strong message make they carry go meet the king. Wetin Ahaziah do na really serious sin; e just do as if Israel no get God. Jehovah don decide say Ahaziah no go well again.​—2 Kings 1:2-4.

Ahaziah no repent, instead e talk say: “This man wey come meet wuna and tell wuna this things, wuna fit describe the man?” The messengers come describe the simple cloth wey the prophet wear, and at once Ahaziah talk say: “Na Elijah.” (2 Kings 1:7, 8) Na good thing for us to know say the way Elijah live e life dey simple well-well and e put all e mind for God’s work. No wonder e no hard Ahaziah to know say the man na Elijah, as they just describe the simple dressing. But we no go fit talk like that about Ahaziah or e papa and mama; they get long throat for property well-well. This example of Elijah de remind us today say make we live simple life as Jesus talk, and put our mind for the thing wey dey important pass for life.​—Matthew 6:22-24.

Ahaziah want revenge. So e send 50 soldiers and their commander to go arrest Elijah. When they see Elijah, e “e sit-down ontop mountain.” * Then the chief, or commander, of the army command Elijah with the name of the king say make e “come down.” This one fit mean say make Elijah follow them make they go end e life. Na wa o! Even though say they know Elijah as “man of the true God,” this soldiers feel say they suppose to put fear for e body make e begin shake. Na really big mistake they make! Elijah tell the commander say: “Well, if I be man of God, make fire come from heaven and make e burn you and your 50 men.” Wetin you think say God do? Well, Bible tell us say: “Fire come from heaven and e burn the chief and e 50 men.” (2 Kings 1:​9, 10) Which thing we learn from wetin happen to this soldiers? We learn say Jehovah no de take-am play when other people no treat e servants well or respect them.​—1 Chronicles 16:21, 22.

Ahaziah send another commander with 50 men. This second commander even worse pass the first one. One thing be say, e no learn anything from the 51 men wey die, even though their ashes fit still dey the side of the mountain. Another thing be say, this second commander show say e no get respect like the first one. And e no only repeat wetin the first one talk say make Elijah “come down.” E still add join-am say “no waste time”! See foolishness! The commander and e men die just like the first group. But na the king even foolish pass. E no shake, e send the third group of soldiers go meet Elijah. But na fine thing say this third commander don get sense. E carry body down go meet Elijah, and e beg Elijah make e no kill him and e men. Elijah na man of God. So e show pity like Jehovah with the answer wey e give the humble commander. The angel of Jehovah direct Elijah make e follow the soldiers go. Elijah obey, and e tell the wicked king again wetin Jehovah talk. The thing wey Jehovah talk no fail, Ahaziah die. Na only for two years e rule.​—2 Kings 1:11-17.

How Elijah endure even as e dey around stubborn people wey no want obey Jehovah? That question dey important today, no be so? How you de feel when person wey you love no want listen to better advice, instead, e continue for way wey no good? The matter no go tire you? wetin fit help us endure when people fail us like that? You remember where the soldiers see Elijah? Na for “ontop mountain.” This one fit teach us something. Na true say we no fit really dey sure why Elijah dey there. But Elijah na person wey de pray well-well and e love God. So, maybe the place give Elijah better chance to fit de near God more-more since the place dey calm. (James 5:16-18) Like Elijah, we fit find time always make we dey alone with God. This kind time go give us chance to beg Jehovah for help, and tell God our problems and the things wey de worry us. This one go fit help us endure when people around us de behave anyhow and de cause trouble for theirself and other people.

The time don reach for Elijah to leave the assignment from God for another person. See the thing wey e do. As Elijah de comot from the town of Gilgal with Elisha, Elijah tell Elisha make e stay there, so that only him go continue the journey to Bethel wey dey about 11 kilometers (7 mi) from there. But Elisha give clear answer. E say: “As long as Jehovah dey alive and as you still dey alive, I no go leave you.” After the two of them reach Bethel, Elijah tell Elisha say only him want travel go Jericho, wey dey around 22 kilometers (14 mi) from where them dey. But Elisha give answer the way e answer before. For the third time, for Jericho, the same thing happen again before they begin go Jordan River, wey far reach about 8 kilometers (5 mi). But like before, Elisha no gree. E no want leave Elijah!​—2 Kings 2:1-6.

Elisha de show for here say e get one fine and important character wey be, love wey no de fail. Na this kind strong love Ruth show Naomi. This kind love de make person no leave something or somebody no matter wetin happen. (Ruth 1:15, 16) All of us wey de serve God need this character for our time pass any other time. Elisha see this character as important character. What about you?

Elijah go don get encouragement from this strong love wey this e young friend show. Because of this one, Elisha get the chance to see the last miracle wey Elijah do. Elijah use e cloth nack the Jordan River for the side. This river de flow fast and e get parts wey deep. But as Elijah nack-am, the river divide! Other people wey still see this miracle na “50 sons of the prophets.” Maybe them dey among the men wey de receive training so that they go fit de direct pure worship for the land. (2 Kings 2:7, 8) Maybe na Elijah de direct the training wey them de receive. Before this time, some years ago, Elijah don feel say na only him be the faithful man wey remain for the land. Since that time, Jehovah don bless Elijah because e endure. This one fit make Elijah see as Jehovah’s worshippers de progress well-well.​—1 Kings 19:10.

After they don cross the Jordan River, Elijah tell Elisha say: “Talk wetin you want make I do for you before God go take me from you.” Elijah know say time don reach make e leave Elisha. E no feel bad say e young friend go take over the work or privilege from e hand. Instead, Elijah ready to help Elisha for any way wey e fit. Na only one thing Elisha ask for, e say: “Abeg, I fit get double portion of your spirit?” (2 Kings 2:9) Elisha no mean say e want times two of holy spirit wey Elijah don receive from God. Instead, wetin e de ask be like the inheritance wey firstborn de get. For the law, because of the new work as family head wey firstborn get, e go need to receive double inheritance, or the biggest part of the property. (Deuteronomy 21:17) Na Elisha go continue the work as God’s prophet after Elijah don comot. So e go need the spirit of strong heart wey Elijah get, so that e go fit do the work.

Elijah dey humble, so e leave the answer for the hand of Jehovah. If Jehovah let Elisha to see Elijah as E de carry the old prophet comot, then the answer wey God give Elisha na yes. And small time, as the two longtime friends “de stroll de talk together,” one wonderful thing happen!​—2 Kings 2:10, 11.

One kind light appear for the sky and the light come de near them small-small. You fit imagine-am? As the strong breeze just begin blow, e de make sound and something wey de shine de move with high speed with the breeze. Them de move go where the two men dey, and na so they separate the men. And maybe this thing wey the men see make them stagger go back and they wonder wetin de happen. The thing wey Elijah and Elisha see be like motor wey de move, na chariot, and e de shine well-well like say they use fire make-am. Elijah know say e time don reach. E go climb enter the chariot, or wetin you think? Bible no tell us. But e go don see himself de go up up for air, inside the strong breeze!

With surprise, Elisha watch wetin de happen. Because Elisha see this wonderful thing de happen for e front, e know say true-true, e go receive “double portion” of the spirit of strong heart wey Elijah get. But now, Elisha no too dey happy to begin think about that one. E no know where Elijah de go, but maybe e no expect to see this e dear old friend again. So with loud voice and pain e say: “My papa, my papa! The chariot of Israel and e horsemen!” Elisha see as e mentor (or, teacher) de disappear for e front; then Elisha tear e clothes because e dey sad.​—2 Kings 2:12.

As Elijah de go up inside the sky, maybe e feel the pain as e hear the voice of Elisha, e young friend. But whether e hear or e no hear, e go don see say e fit endure some problems because of this kind friend. Na fine thing for us to learn from the example of Elijah. We go de make tight friend with people wey love Jehovah and wey de try to do the thing wey E want.

Which place be the next place wey Elijah go? Some religions de teach people say e go heaven go meet God. But no be like that. After many years, Jesus Christ talk say before e come this earth, nobody don go heaven. (John 3:13) So when we read for Bible say “Elijah go heaven for inside strong breeze,” we must ask say, Which heaven? (2 Kings 2:11) When the Bible use the word “heaven,” e no de only talk about the place wey Jehovah de live. “Heaven” still mean where cloud dey and where birds de fly for up for our earth. (Psalm 147:8) Na that heaven, or sky, Elijah go. Then, wetin happen?

So Jehovah just carry or move this dear prophet to one new assignment for the kingdom of Judah. Wetin dey Bible show say Elijah still continue work for there, maybe even after seven years. That time, na wicked King Jehoram de rule Judah. E marry the daughter of Ahab and Jezebel, so their wickedness still de work. Jehovah tell Elijah make e write letter of judgement about Jehoram. As Jehovah talk, Jehoram death bring shame. The one wey worse pass na the way the story end. Bible talk say: “Nobody regret-am when e die.”​—2 Chronicles 21:12-20.

This wicked man and Elijah really dey different! Na true say we no know when or how Elijah die. But we know say e no die the way Jehoram die, wey nobody regret e death. Elisha miss e friend. The other faithful prophets go don really miss Elijah too. Even after about 1,000 years, Jehovah show say e still value Elijah. For one vision wey Jesus Christ face and cloth begin shine, Jehovah make one person to appear as Elijah. (Matthew 17:1-9) You go like to learn from Elijah and make your faith grow so that you fit endure problems? If na so, make you no forget to de make friends with people wey love God. Make you still put your mind for the service of Jehovah and always de pray from your heart. And like Elijah, you go always dey the heart of Jehovah and e go remember you forever!