For United States, from 1990 to 2015, the number of divorce wey don happen among people wey dey 50 years and wey don pass don double, and e pass like that for people wey don pass 65 years. Wetin de make people wey don de old to divorce? Wetin you fit do make this kind thing no happen for your marriage?

For this article, we go talk about:

•  Wetin de make people wey don de old to divorce?

•  Wetin you fit do?

•  Things wey husband and wife fit talk about

•    Many times, husband and wife wey don de old de divorce each other because small-small them stop to do things together. As time de go, some husband or wife fit start to like some things wey dey different from wetin each of them de like. And this one fit make their friendship with each other weak. Or after their children don grow and comot from house, the husband and wife fit come see say them don care for their children for long time and forget how to care for each other as husband and wife.

•    For some years now, people wey other people de see as expert for marriage matter de tell husband and wife say make each person de only think about wetin e need. Them de advice husband and wife say make each of them ask theirself say, ‘This marriage de make me happy?’ ‘This marriage de help me be better person?’ ‘My husband or wife de make me feel say e love and value me?’ If the answer to any of this question na “no,” the way people de think now be say, do wetin go better for you​—divorce the person and start new life.

•   People no de see divorce as bad thing again. Eric Klinenberg wey be expert for matter wey concern how people de behave talk say: “Before if you no de happy with your husband or wife and want divorce-am, you need to give correct reason why you want divorce-am. But no be so e be today: If you no de happy with your marriage, you need to explain why you never comot from the marriage since, because many people today believe say wetin dey important pass na to leave the marriage if that one go make you happy.” a

 The truth be say divorce no de end person problem, and e get e own problem. For example, one research show say “when people wey dey 50 years or wey don pass divorce, this one de cause serious money problem especially for women.”

 Another thing dey wey person need to think about. The book wey them de call Don’t Divorce talk say: “You fit start new life, but you never still change who you be.” E still talk say: “How you de talk now don change from the way you be de talk with your husband or wife wey make the marriage no work? Wetin you don do to change the way you de handle matter wey fit cause quarrel?” b

•   Accept say things don change for your marriage. After sometime, relationship de change. The tight friendship wey you get with your husband or wife fit don change because una children no de live with una again, or because the two of una no de like the same things again. Instead of to de wish say things for just remain as them be for past, think of wetin you fit do to make things better now.

    Bible advice: “No talk say, ‘Why yesterday better pass today?’ because person wey get sense no de ask this kind question.”​—Ecclesiastes 7:⁠10.

•   Continue to make una friendship strong. You fit start to like the new things wey your husband or wife de like, or you fit help-am to like the things wey you de like now? You fit do new things wey the two of una fit enjoy? Wetin you go get for mind na for una to de spend time together, so that una go de feel like husband and wife no be roommate.

   Bible advice: “Make each person no de look for wetin go benefit only imself, but make e be wetin go benefit another person too.”​—1 Corinthians 10:⁠24.

•   Continue to treat each other for kind way. No stop to treat your husband or wife with respect just because una don dey together for long time. De talk to-am with respect, and try to de use the sweet words wey una de use for each other before una marry. De talk “abeg” and “thank you.” Always de talk and do things wey show say you love your husband or wife, and say you value the things wey e de do for you.

   Bible advice: “Make una dey kind to each other, de really show pity.”​—Ephesians 4:⁠32.

•   Remember those days wey una love de burn like fire. Make una de look una wedding album together, or de look pictures of other place wey una go together. This one fit help una, or make una come start to get love and respect for each other more-more.

   Bible advice: “Each of una must love im wife as e love imself; and make the wife get deep respect for im husband.”​—Ephesians 5:⁠33.