Because of the bad things wey social media fit cause, many mama and papa no de allow their children to use-am. But if you de allow your children use social media, how you fit help them learn how to use-am well so that them no go enter trouble?

For this article

•  Things wey really dey important to your children

•  How your children de feel

•  How your children de behave for internet

•  Things wey you and your children fit talk about

 Wetin you need to know: When person de use social media, e fit hard for-am to stop-am. Because of this one, your pikin fit need your help to fit control the time wey e de spend for social media.

 Bible Advice: “Dey sure of wetin dey important pass.”—Philippians 1:10.

 Things to think about: Social media de disturb your pikin sleep, school-work, or the time wey e suppose spend with the family? People wey de do research talk say young people need to sleep for about 9 hours every night. But young people wey de spend plenty time for social media de sleep for time wey no reach seven hours.

 Wetin you fit do: Talk with your pikin about things wey dey important. Talk about why e dey wise to reduce the time wey e de spend for social media. Set rule wey make sense. For example, you fit set rule say no computer or phone for bedroom for night. Wetin you really want na to help you pikin to fit control e self. This one go help-am as e de grow.—1 Corinthians 9:25.

 Wetin you need to know: When young people de look pictures of other people wey them don edit, when them de look pictures wey people put for internet wey de show only the sweet and fine-fine things wey them de do, e fit start to make the young person de feel like say e dey alone, de worry-worry and e fit make life tire-am.

 Bible advice: “Remove . . . jealousy.”—1 Peter 2:1.

 Things to think about: Social media de make your pikin de compare the way e de dress or how e body be with other people? Your pikin de feel say other people life just de sweet and e own life dey bad?

 Wetin you fit do: Talk with your pikin and help-am see why e no good to compare e self with other people. Know say this one fit affect girls pass boys, because girls really de put mind for their relationship with people and how their body be. You fit even ask your pikin if e go fit comot for social media for some time. One young man wey e name na Jacob talk say: “I delete my social-media app for some time. This one help me arrange myself well to know wetin dey important pass for my life. E still help me balance the way I de see myself and the way I de see other people.”

 Wetin you need to know: People talk say to de for social media just be like say you de stand for front of many people. E dey natural say people no go understand theirself and them fit de get problem with each other.

 Bible advice: “Make wuna stop all kind of bad heart, over vex, hot temper, shout-shout, curse-curse . . . Make wuna dey kind to each other.”—Ephesians 4:31, 32.

 Things to think about: Social media don make your pikin de gossip, de fight, or de talk bad about people?

 Wetin you fit do: Teach your pikin to get better character when e dey online. The book wey them de call Digital Kids talk say: ‘na part of our work as mama and papa to really teach our children say e no good to dey wicked whether them dey online or them dey with person face-to-face.’

 Remember say no be must to get social media, and no be all mama and papa de allow their children to de for social media. If you allow your children to use-am, make sure say your children don mature reach to fit reduce the time wey them take de use-am, get better friends for there, and run from things wey no clean.