Na every time we de watch news wey de make us fear. E just dey everywhere​—for television, phones, computer and many times, they go show video of the things wey don happen. This kind video fit even shock us to watch.

 And children de watch-am.

 How you fit help your children make fear or shock no de worry them because of bad news reports?

•  How news de affect children?

•  Wetin you fit do to help your children make they no de fear to watch news?

•  What if your pikin don dey for place wey bad things don happen and e shock-am or make-am fear?

•   Plenty children de fear because of the bad things wey don happen wey them de watch for news. Some children fit no really talk the way them de feel, but when they watch bad news report, e fit really disturb their mind. a And if their papa and mama too de fear or over worry because of the news report, e fit even add to the fear wey the children get.

•   When children watch news, they fit interpret the message for wrong way. For example, some children de feel say wetin they watch go happen to their family. Sometimes, news channel fit de repeat the same bad news to de show-am for people to watch, but when small children de watch this bad news again and again, they fit de think say na that kind bad thing de happen again and again.

•   E fit hard for children to know whether na so the news report really happen or no be so. They fit no understand say news company them de work to make plenty money. And them de make this money when they get plenty people to watch their news. So, they fit add some things to the story for their news so that people wey de watch the news go continue to listen because they want hear more story.

•   No de allow them de watch every bad news report wey dey for news. This one no mean say make your children no know wetin de happen for the world. But e no de really help when children watch or hear bad report wey news de show again and again.

   “Sometimes we de talk about all the things wey we watch for news, we no know say all this discussion de really worry our children wey de listen to us.”​—Maria.

   Advice for Bible: “Worry na heavy load.”​—Proverbs 12:25, Contemporary English Version.

•   Take time to listen to your children, make your answer show say you care. If e hard for your pikin to talk about the thing wey don happen, ask-am whether e fit draw wetin happen instead of to talk-am. Discuss with your pikin about the things wey de make-am worry, use the kind words wey e go understand, but no tell-am things about the bad news wey e no need to know.

   “E be like say our daughter de feel better after we don sitdown and listen to wetin e de talk. Wetin no de work na when we tell-am say, ‘Na so things be now o, and we go just need to continue our life like this.’”​—Sarahi.

   Advice for Bible: “Dey ready to listen more, no de talk quick.”​—James 1:19.

•   Help your pikin make e know say sometimes no be so the story really happen. For example, the way news fit talk story about one person wey they don kidnap, fit make-am be like say kidnappers don full the whole area and them de kidnap people anytime wey they want. Explain to your children the different things wey you don do to make sure say them dey safe. And no forget say when one bad thing happen and e enter news, no be because e dey common, but because e no dey common.

   “Help your children to fit manage with the way them de feel. Plenty times, na wetin them de think de affect the way them de feel, so if we help them to de think about good things, e go help them feel better.”​—Lourdes.

   Advice for Bible: “Wise person heart de give e mouth sense to talk and e de make wetin e de talk move person.”​—Proverbs 16:23.