As time de go, the love and care wey some married people de show each other de die small-small. If this one de happen for your marriage, e suppose worry you?

•  Wetin you need to know

•  Wetin you fit do

 Love dey important for marriage to dey strong. For body to dey strong you must always de chop food and drink water. Na so e still be for marriage, husband and wife must always show love for each other for their marriage to dey strong. Even if wuna don marry for plenty years, husbands and wives need to dey sure say they love and care for each other.

 True love no de think of only e self. True love go make husband and wife de always think of how to make each other glad. So, instead of to show love to your husband or wife only when you feel like to show love, make husband or wife know when e wife or husband need love and care and make e show-am.

 For marriage, wife de need love pass e husband. Husband fit really love e wife. But if e de show this love only for morning and night or only when e want sleep with e wife, the wife go de doubt if e husband really love her. E good to always show love all the time everyday.

 Show love by wetin you talk. To say things like “I love you” or “You dey very important to me” fit make your husband or wife feel your love.

 Bible advice: “Wetin person de talk about na wetin full e heart.”​—Matthew 12:34.

 Something wey you fit do: No use only your mouth to tell your husband or wife say I love you. Write-am for paper, or send-am for e-mail or text message.

 Show love by wetin you do. When you hug, kiss or hold the hand of your husband or wife, e go show say you really mean-am when you say “I love you.” You fit show say you really care when you touch your husband or wife for gentle way, look your husband or wife with love, or give your husband or wife gift. You fit still help your wife carry bags, open door, wash plates, wash clothes or cook food. Plenty people no just de see-am as help, na fine ways to show love!

 Bible advice: “Make we no de love only for mouth, but make we show-am for things wey we de do.”​—1 John 3:​18.

 Something wey you fit do: Treat your husband and wife with love just as wuna de do before wuna marry.

 Get time for your husband or wife. When husband and wife dey together alone e de make their marriage strong and e go make them dey sure say they like to stay with each other. Na true say, to dey together alone fit hard, if you get pikin them or if you get plenty things wey wuna need to talk about everyday. Maybe wuna fit plan to waka around​—just the two of wuna.

 Bible advice: “Make wuna fit dey sure of wetin dey important pass”​—Philippians 1:​10.

 Something wey you fit do: Some husband and wife de always find time go out together “for night” or “for weekend” so that they fit dey together alone.

 Know your husband or wife. Everybody get different way of how they want make person show them love. Make the two of wuna talk about how you want make they show you love and whether you want make they show you more love. After, try your best to show love the way your husband or wife want-am. Remember say, love dey important for marriage to dey strong.

 Bible advice: “Love . . . no de think of only e self.”​—1 Corinthians 13:4, 5.

 Something wey you fit do: Instead of to tell your husband or wife to show you love, ask yourself say, ‘Wetin I fit do to make my husband or wife show me more love?’