THINGS WEY FIT HELP FAMILY | FOR PAPA AND MAMA
How to Talk to Your Children About the bad Way Wey People De Treat People From Other Tribe
As your pikin de grow, e fit don see say some people de treat other people for different way because of their skin color or the place wey them come from. How you fit help your pikin make this kind character no affect-am? Wetin you fit do if na your pikin them de treat for bad way because of where e come from?
For this article, we go talk about
How you fit talk to your children about people from other place?
Wetin you fit talk. The way Jehovah make human being body no be the same. Even the way people wey come from one tribe de do things, dey different from another tribe. This one don make some people treat people from other tribe for bad way, because say their body different and them no de do things the same way.
But Bible de teach us say all of us come from the same mama and papa. This one mean say we be the same family.
“Na from one man [God] make all the nation of people.”—Acts 17:26.
“When our children spend time with people wey come from another tribe, them de see say them need to show love and respect for each person.”—Karen
How you fit explain to your children about the bad way wey people de treat people from other tribe?
Small time, your pikin go hear story about the bad things wey people de do to people wey come from another tribe. How you fit explain to your pikin wetin de happen? Na the age of your pikin go help you decide wetin you fit tell-am.
For pikin wey never start to go school. Dr. Allison Briscoe-Smith, talk for one magazine wey them de call Parents magazine, say: “Small pikin de quick know when them do person partial. This one fit give you better chance to talk to them about partial.”
“God no de do partial, but for every nation, God de accept any person wey de fear-am and de do wetin correct.”—Acts 10:34, 35.
For children wey never reach 13 years. Children wey their age dey between 6 and 12 years de like know plenty things, and sometimes, them de like to ask questions wey hard to answer. Try your best to answer their questions. Talk to your children about the things wey them see for television and Internet, and use this chance tell them why e no good to treat people wey come from another tribe for bad way.
“Make all of una get one mind, de feel for each other, de love each other like people for the same family, de really pity for each other and de carry body down.”—1 Peter 3:8.
For children wey never reach 20 years. Young people wey their age dey between 13 to 19 years fit understand matter wey no easy to understand. So, when your pikin dey this age, na better chance to talk with-am about bad things wey you hear from news, wey people de do to people wey come from another tribe.
“Mature people . . . don train their mind for the way them de use-am to know the difference between good and bad.”—Hebrews 5:14.
“We talk to our children about the bad way wey people de treat people wey come from another tribe, because no matter where them de live, them go see-am. If we no tell them, when them meet people wey de feel say them better pass other people, them fit start to think like them. People fit tell them plenty lie and make them feel say na true.”—Tanya
How you fit show better example to your children?
Children de learn from wetin them see, so papa and mama, e dey important to dey careful with wetin you de talk and wetin you de do. For example:
You de laugh people wey come from another tribe? American Academy of Child and Adolescent Psychiatry talk say: “Your children de hear wetin you de talk and de see wetin you de do and them go want be like you.”
You de like to dey with people wey come from other place? Doctor Alanna Nzoma wey be doctor for children, talk say: “If you want make your children get better friendship with people wey come from other place, them suppose first see-am say you de do like that.”
“Make una respect all kind of people.”—1 Peter 2:17.
“For many years, people wey come from different-different part of the world de come visit us and stay for our house. We learn the kind food wey them de chop, learn their song and wear the kind cloth wey them de wear. We tell our children about people, no be where them come from. And we always dey careful make we no de talk like say na our tribe better pass other people tribe.”—Katarina
Wetin you go do if person treat your pikin for bad way because of im tribe?
Even though say plenty people de talk say everybody get equal right, people still dey treat other people wey come from another tribe for bad way. This one mean say them fit treat your pikin for bad way, especially if them feel say e come from tribe wey them no too many and so, them no dey important. If that kind thing happen . . .
Try know the whole story. The person really want treat your pikin for bad way or e do-am by mistake? (James 3:2) Somebody go need to talk to the person wey treat your pikin for bad way, or na something wey you fit just forget?
E dey important make you reason the matter well. Bible give us better advice, e talk say: “Make you no de vex quick.” (Ecclesiastes 7:9) To treat person for bad way because the person come from another tribe na serious matter, but e no mean say every time wey them talk bad to us or treat us for bad way, na because we come from another tribe.
The truth be say each situation dey different, so e go good make you try know wetin really happen before you decide wetin you go do about the matter.
“When person de put mouth for matter before e hear the whole story, na foolish thing and na disgrace.”—Proverbs 18:13.
After you don know the whole story, ask yourself say:
‘E go help my pikin if e de think say everytime wey them insult-am or treat-am for bad way, na because e come from another tribe?’
‘My pikin go gain if e follow this advice for Bible wey talk say: “No put everything wey people de talk for mind”?’—Ecclesiastes 7:21.
“Make everybody know say una de do things with sense.”—Philippians 4:5.
Wetin you go do if you see say no be by mistake the person take treat your pikin for bad way? Help your pikin know say na wetin e do go make the matter better or worse pass as e be. Sometimes, the person wey de laugh or insult or treat another person for bad way, de wait to see wetin the person go do. For this kind situation, e fit be say the best thing wey you fit do na to leave the matter.
“When wood no dey, fire go die.”—Proverbs 26:20.
If you think say you go need to do something about the matter, you fit let your pikin talk to the person wey treat-am for bad way, if this one no go cause more problem. E fit talk something like this: “I no think say the way you talk to me or wetin you do me good.” But make e talk-am for way wey e no go cause more problem.
What if you decide say you go report the matter? If you feel say your pikin life dey for danger, or you get other reason wey make you feel say you no need to leave the matter, no fear to go report the matter for their school or even to police.