THINGS WEY FIT HELP FAMILY | HOW TO CARE FOR CHILDREN
How You Fit Be Good Papa
For this article we go talk about:
Wetin be the work of papa?
Before your wife born. The kind husband wey you be now de show the kind papa wey you go be later. One book wey the title na Do Fathers Matter? talk say:
“Husband wey de help im wife wey get belle buy things, de follow-am go hospital go see doctor, go do scan to see how the pikin de grow, or hear how the pikin heart de beat, de show say e go support im wife and care for im pikin when im wife born-am.”
“I no want make my wife feel like say e dey alone when e get belle, so I help-am anyway wey I fit. We even arrange the baby room together. The time wey we take prepare for our baby together na wonderful time.”—James.
Bible advice: “Make una no de look for wetin go benefit only unaself, but wetin go still benefit other people.”—Philippians 2:4.
After una don born the pikin. When you de play with your pikin and as you de carry-am e go make-am dey close to you as e dey grow. Make you follow care for the pikin. Wetin you do as papa de affect the wey your pikin de grow. When you dey close to your pikin, you de show say you value-am.
“Bring yourself down play with your pikin. Follow-am play like small pikin and ready to laugh with-am. Remember say the first thing wey your pikin go know about love na wetin e learn from you.”—Richard.
Bible advice: “Children na gift from Jehovah. Children na reward from God.”—Psalms 127:3.
As your pikin de grow. Research show say children wey dey close to their papa de do well for school, no too get problem wey de worry them for mind, and many of them no de abuse drugs and de do bad things. Spend time with your pikin and do things with-am so that una go be good friends.
“My son tell me say wetin e go miss pass when e start to stay alone na the long talk wey we de enjoy when we de travel or when we de chop for evening. Many of the discussion wey I enjoy pass with my son happen when I no expect. This one happen because we de spend time together well-well.”—Dennis.
Bible advice: “Make una de really watch how una de live make e no be as people wey no get sense, but make e be as people wey get sense. And make una de use una time well.”—Ephesians 5:15, 16.
How the work wey papa de do dey special?
The first thing wey de come people mind wey be the work of papa be say, na papa de protect im family and give them things wey them need like, food, cloth, and where them go stay. And say the work of mama na to show love and care for im family. (Deuteronomy 1:31; Isaiah 49:15) But for some family, papa de do part of the work wey mama de do and mama de do part of the work wey papa de do. But even with this one, people wey de study about family matter talk say papa and mama get their own special work for family. a
One woman wey de study about family matter use im own story talk about this one. E talk say: “When motor jam my twelve years old pikin wey be girl, e talk say na im papa e want make e dey with-am for the motor wey go carry-am go hospital, because e know say im papa go protect-am for inside the motor. And later for hospital, e say make I sitdown near-am so that I go fit comfort-am.” b
“E dey easy for papa to protect im family and make things de go well for the family. But this one fit hard for mama to do. And mama de help the children see say e and their papa love them and say them understand how the children de feel. The two of them de work together for the family.”—Daniel.
Bible advice: “My son, listen to the correction of your papa, And no leave the advice of your mama.”—Proverbs 1:8.
How papa fit help im girl pikin?
As papa, na you go teach your pikin wey be girl how other men suppose treat-am. See two ways wey you fit do this one:
From the way you de treat im mama. When you love and respect your wife, this one go help your daughter know the better character wey the man wey e go marry for future suppose get.—1 Peter 3:7.
From the way you de treat-am. When you de respect your daughter, you de teach-am say e need to respect imself. This one go still help-am know say na so men suppose treat-am.
If papa de always talk to im daughter anyhow, this one fit make the pikin de feel say e dey useless, and e fit make-am start to look for other men wey go show-am say them value-am. This men fit no get good thing for mind for-am.
“Girl wey im papa de show love and de support, no go quick fall in love with man wey no get the better-better character wey good husband suppose get.”—Wayne.