Bible no talk about Halloween. Halloween na holiday wey plenty people de celebrate for October 31 every year. But, the way Halloween take start and the different-different tradition wey them de do no agree with wetin Bible de teach.

For this article

•  How them don de do Halloween

•  The way them start Halloween suppose concern us?

•  Why them call-am Halloween?

•   Samhain: The World Book Encyclopedia talk say we fit know how Halloween take start when we check one “pagan festival wey Celt people de do for olden days, this one don pass over 2,000 years. The Celt people believe say when them de do this Samhain festival, people wey don die de waka with people wey still dey alive and say people wey dey alive fit still visit their people wey don die.”—Check “ Why them call-am Halloween?”

•   Halloween clothes, sweet, and how children de go different-different people house to collect things: According to one book, some of the Celt people de wear clothes wey de make them resemble evil spirit, so when the real evil spirit them de waka and see them wear this clothes “them go think say all of them na the same” and them no go disturb them. Other people de give the spirit different-different sweet to make them happy. a

   Around 500 C.E to 1500 C.E for Europe, leaders for Catholic start to celebrate some of the festival wey the pagan people wey dey around them de do and this leaders start to encourage their church members to wear the clothes wey them use do this festival de go different people house to collect small-small gifts from them.

•   Ghosts, vampires, werewolves, witches, and zombies: People de connect this things with evil spirit. And the book Halloween Trivia de call them “supernatural monsters,” and e still talk say this things still “connect with dead people, and the fear say person fit die.”

•   Halloween pumpkins, or jack-o’-lanterns: For around 500 C.E to 1500 C.E for Britain, people “de go different-different people house de tell them say them go pray for their person wey don die, if they give them food,” and them de carry “lanterns wey them use turnip make, them de comot wetin dey inside the turnip and put candle inside-am. This candle mean the soul of person wey don die wey them cage for purgatory.” (Halloween—From Pagan Ritual to Party Night) Some book talk say na the lanterns them de use pursue evil spirits comot. From the year 1800 for North America, them start to use pumpkin instead of turnip because pumpkin plenty well-well and e dey easy to make hole inside-am.

 Yes. Even though say some people think say Halloween no bad, the things wey them de do when them de celebrate-am no agree with wetin Bible de teach. Halloween come from lie-lie belief about dead people and wicked spirits wey we no fit see.

 Notice how some Bible verse help us see how God de think about the things wey them de do for Halloween:

•   “Make nobody dey with wuna wey de . . . receive message from spirits, or anybody wey de talk with the dead.”—Deuteronomy 18:10-12.

   This one mean say: God no want make anybody de talk with dead people or even try to do anything wey go be like say e want talk to them.

•   “People wey don die no know anything again.”—Ecclesiastes 9:5.

   This one mean say: Since people wey don die no know anything again, them no go fit talk or get aything to do with people wey dey alive.

•   “I no want make una get anything to do with the demons. Una no go fit de drink from the cup of Jehovah and the cup of demons.”—1 Corinthians 10:20, 21.

   This one mean say: People wey want make God bless them no go get anything to do with demons.

•   “Stand strong against the traps from the Devil; Because the fight wey we get, no be against blood and flesh, but na . . . against wicked spirits for the heaven.”—Ephesians 6:11, 12.

   This one mean say: Christians no suppose get anything to do with demons and no go even de do like say them de celebrate with them.