Bible be don talk-am say sickness (different-different sickness, even the ones wey de spread around the world) go dey for the last days. (Luke 21:11) This kind sickness no be punishment from God. The truth na say, God go soon use e Kingdom remove all sickness, even the ones wey de spread around the world.

•  Bible talk say disease go spread around the world?

•  God don ever use sickness punish people?

•  The disease wey de spread now na punishment from God?

•  Time de come wey disease like this no go ever dey?

•  Different-different Bible verse about sickness

 Bible no call the name of any particular disease wey go spread, like COVID-19, AIDS, or the Spanish flu. But e talk say “sickness go de spread from one place go other place” and say “different-different kind of bad disease” go dey. (Luke 21:11; Revelation 6:8) All this things na part of the sign say we dey “the last days,” or say “the end of this wicked world don near.”—2 Timothy 3:1; Matthew 24:3.

 Bible talk about some people wey God punish with sickness. For example, e make some people get leprosy. (Numbers 12:1-16; 2 Kings 5:20-27; 2 Chronicles 26:16-21) But even for this small examples, no be say God just cause the sickness, make innocent people de suffer-am. Instead, na people wey don open eye do wetin God no like, na them e punish with those sickness as their judgment.

 No. Some people de talk say the disease wey de spread for this our time and other sickness, na punishment from God. But Bible no support that one. Why?

 One reason na say, no be today sickness start to happen, even to people wey de worship God. For example, Timothy na person wey get strong faith for God, but e de always get sickness. (1 Timothy 5:23) Bible no talk say the sickness na because God de vex for Timothy. Na so e still be today, some people wey de worship God fit de sick or catch disease wey de spread. E fit just be because them dey for one place for the wrong time.—Ecclesiastes 9:11.

 Another reason na, Bible teach us say time never reach for God to punish wicked people. Instead e talk say the time wey we de live now na “the day of salvation.” That one mean say, now na time wey God de tell people say make they draw body near-am so that e go fit save them. (2 Corinthians 6:2) One way wey God de tell people to come near-am, na with the preaching work wey de happen around the world. The message of this preaching na “good news about the Kingdom.”—Matthew 24:14.

 Yes. Bible talk say the time go soon come wey nobody go sick again. God go remove all kind of sickness when e Kingdom don de rule this earth. (Isaiah 33:24; 35:5, 6) E go remove suffer, pain and death. (Revelation 21:4) And e go bring people wey don die back to life. Their body go dey strong and they go live for this earth when everything don dey perfect.—Psalm 37:29; Acts 24:15.

 Revelation 6:8: “Look, I see horse wey e color don fade. And the name of the person wey sitdown ontop na Death. And Grave de follow-am for back. And they give them power . . . make they fit kill people with . . . different-different kind of bad disease.”

 Wetin e mean: The prophecy about the four men wey de ride horse wey dey the book of Revelation make us know say disease go de spread for this our time.