Easter celebration no come from Bible. If you check how them de do-am for past, you go see say Easter na tradition wey come from the kind bad rituals wey them de do for olden days. Make we see some examples.

1.   Name: The Encyclopædia Britannica talk say: “We no know where the English name Easter come from; One English priest wey im name na Venerable Bede wey live around 8th century talk say the name Easter come from “Eostre” wey be woman god of new season wey things de grow” Other books call-am Astarte wey be the woman god of the people of Phoenicia, and another god wey be like this one, wey dey Babylon na Ishtar.

2.   Rabbits: Rabbit na sign of new life “wey them don de use for olden days festivals, wey people for Europe de use for their pagan ceremony of new season wey things de grow.”​—Encyclopædia Britannica.

3.   Eggs: According to Funk & Wagnalls Standard Dictionary of Folklore, Mythology and Legend, the way people de look for Easter eggs, wey them believe say na Easter rabbit bring, “no be small pikin play at all, because them de see-am as part of the sign of fertility,” and some culture believe say Easter egg wey them decorate “fit bring happiness, make them rich, give them better body wey strong, and protect them.”​—Traditional Festivals.

4.   New Easter cloth: “Them believe say person no get respect if e no wear new cloth to greet the woman god of new season wey things de grow, or Eastre, wey them de worship for Scandinavia and say this one fit bring bad luck.”​—The Giant Book of Superstitions.

5.   Service wey them de do for the morning of Easter day: This tradition come from people wey de worship the sun for olden days and “them de do-am for the beginning of new season, when day and night dey equal, na that time them de welcome the sun and im great power to make new things grow.”​—Celebrations​—The Complete Book of American Holidays.

 When the book The American Book of Days de talk about how Easter take start, e talk say: “E dey clear say, for olden days, Church accept the pagan customs wey people de do and give them Christian meaning.”

 Bible warn us say make we no worship God through traditions or customs wey no de make God happy. (Mark 7:6-8) For second Corinthians 6:17, Jehovah talk say: “Make una separate unaself, and stop to touch the thing wey no clean.” Easter na pagan holiday wey people wey want make God happy go comot hand from.