Wetin Bible Talk About Daniel?

PLAY

The answer wey Bible give

Daniel na important Jew prophet wey live around 700 to 600 years before them born Jesus. God give-am power to interpret dreams, e show-am vision about wetin go happen for future and still use holy spirit move-am to write the Bible book wey e name na Daniel.—Daniel 1:17; 2:19.

Who be Daniel?

Daniel grow for Judah. Judah na kingdom wey the city of Jerusalem and the temple dey. For 617 B.C.E., Nebuchadnezzar wey be the king of Babylon win Jerusalem and carry the men wey important pass for the land go Babylon. (2 Kings 24:15; Daniel 1:1) E fit be say Daniel still dey young that time wey them carry-am go Babylon.

Them carry Daniel with other young men (like Shadrach, Meshach, and Abednego) go the palace for Babylon to receive special training to work for government. Even though say them try to force Daniel and im three friends to do bad things, them continue to dey faithful to Jehovah their God. (Daniel 1:3-8) After them receive training for three years, King Nebuchadnezzar praise Daniel and im three friends for the sense wey them get and the things wey them sabi do. King Nebuchadnezzar talk say them better pass all the priests wey de do magic for the whole nation ten times. E choose Daniel and im friends to serve for the court of the king.—Daniel 1:18-20.

Many-many years later, when Daniel dey around 90 years old, them ask-am make e come the palace. One man wey e name na Belshazzar wey de rule Babylon that time ask Daniel to talk the meaning of wetin one hand wey just appear write for wall. God help Daniel, e explain say Medo-Persia Kingdom go destroy Babylon. Na that same night them win Babylon.—Daniel 5:1, 13-31.

Now wey Medo-Persia don de rule Babylon, King Darius give Daniel high position and e still want give-am position wey high pass that one. (Daniel 6:1-3) Other people wey get high position for the king palace come de jealous Daniel, them plan to kill-am as them throw-am inside pit wey lion dey, but Jehovah save-am. (Daniel 6:4-23) As e de near the time wey Daniel go die, one angel appear to-am and na two times the angel tell Daniel say “you really dey special.”—Daniel 10:11, 19.

To make the story dey real to you watch this drama wey get two part wey the title na Daniel: E Show Faith for E Whole Life.

Wetin history talk about the Bible book of Daniel?

Wetin Daniel talk: Nebuchadnezzar make one big image and e command im people make them worship-am, and anybody wey no obey, them go trowey-am inside fire.—Daniel 3:1-6.

Wetin history talk: Nebuchadnezzar do big building projects for Babylon, ‘no be only to praise imself, but e still do-am to honor the gods as Encyclopædia Britannica talk. “E claim say na ‘im make-am possible for the people to fit worship their gods.’”

To burn person inside fire no be new thing for Babylon people, as them talk about-am plenty times for their history, and some time na the person wey de rule go even talk say make them do-am. One old writing wey them write for the time wey Nebuchadnezzar de rule show the punishment wey people de get when them no respect the gods of Babylon. Them write say: ‘Destroy them, burn them, roast them, . . . put them inside oven . . . make the fire hot well-well, and make the smoke plenty so that them go die.’ a

Wetin Daniel write: King Nebuchadnezzar boast about all the building project wey e don do.—Daniel 4:29, 30.

One block wey them dig from ground for Babylon wey get Nebuchadnezzar name

Wetin history talk: ‘The things wey Nebuchadnezzar write about imself show us say e de feel say im na great king wey righteous and dey powerful.’ b For example, for one building them write one boast wey Nebuchadnezzar talk, e say: “I use bitumen (wey be coal tar) and block build one big wall wey be like mountain wey them no fit move. . . I make Esagila and Babylon strong well-well so that people go use-am remember the time when I rule.” c Many of the blocks wey them dig from ground for Babylon get Nebuchadnezzar name

Wetin Daniel write: King Belshazzar give Daniel chance to “rule as the third person wey important pass for the kingdom” of Babylon.—Daniel 5:1, 13-16.

This block wey them de call cuneiform cylinder wey dey since 550 B.C.E., mention King Nabonidus and im son Belshazzar

Wetin history talk: One man wey im name na Nabonidus na king when them write the things wey happen for Daniel chapter 5. But Nabonidus spend plenty of the time wey e rule for Arabia, no be for Babylon. Who come de rule Babylon when e no dey? ‘As one old record talk, Nabonidus give the kingdom to im first son wey e name na Belshazzar make e de rule.’ Na wetin one person wey study history, wey im name na Raymond Philip Dougherty explain for im book wey be Nabonidus and Belshazzar. ‘Belshazzar represent e papa as e do all the things wey king suppose do.’ Because Nabonidus and Belshazzar don already be the first and second most important person for the kingdom, Belshazzar give Daniel chance to be the third person wey important pass.

a Journal of Biblical Literature, Volume 128, Number 2, pages 279, 284.

b Babylon—City of Wonders, wey Irving Finkel and Michael Seymour write, page 17.

c Archæology and the Bible, wey George Barton write, page 479.

Topics wey want be the same

Bible The Answer Wey Bible Give

Jehovah Witness

Wetin Bible Talk About Daniel?

The answer wey Bible give

Who be Daniel?

Topics wey want be the same

You May Also Like

How We Know Say Wetin Bible Talk Na True?

Try Our Bible Study Program