Who De Go Heaven?
The answer wey Bible give
God don choose one small number of faithful Christians, wey after they don die, God go bring them back to life to live for heaven. (1 Peter 1:3, 4) The only way wey they fit continue to get this blessing, na if they continue to obey God and get strong faith.—Ephesians 5:5; Philippians 3:12-14.
Wetin this people de go do for heaven?
They go join Jesus to serve as kings and priests for 1,000 years. (Revelation 5:9, 10; 20:6) They go be the “new heavens,” or new government for heaven, wey go rule over the “new earth,” or new group of people for this earth. From heaven, they go rule this earth and they go help people to live the kind life wey God don always want for people from the beginning.—Isaiah 65:17; 2 Peter 3:13.
How many people God go bring back to life to live for heaven?
Bible talk say na 144,000 people God go bring back to life to live for heaven. (Revelation 7:4) For the vision wey dey for Revelation 14:1-3, apostle John see “the Lamb as e stand ontop Mount Zion, and e dey with 144,000 people.” For this vision, “the Lamb” stand for Jesus when e don come back to life. (John 1:29; 1 Peter 1:19) “Mount Zion” stand for the important position wey Jesus and the 144,000 wey go join Jesus rule for heaven get.—Psalm 2:6; Hebrews 12:22.
Bible call the “people wey [God] call and choose” to rule with Jesus Christ for the kingdom, “little flock.” (Revelation 17:14; Luke 12:32) This number small, if you compare-am with all the number of the sheep wey Jesus get.—John 10:16.
Wrong ideas about who go go heaven
Wrong idea: Na all good people go go heaven.
The truth: God promise say e go give everlasting life to plenty good people for this earth.—Psalm 37:11, 29, 34.
Jesus talk say: “Nobody don go heaven.” (John 3:13) When Jesus talk this one, e show say good people wey don die before e come this earth like Abraham, Moses, Job, and David, no go heaven. (Acts 2:29, 34) Instead, they get the hope say God go bring them back to life for this earth.—Job 14:13-15.
Bible call the resurrection of people wey de go heaven, “the first resurrection.” (Revelation 20:6) This one mean say another resurrection go dey and e go happen for this earth.
Bible teach say when the kingdom of God de rule, people “no go die again.” (Revelation 21:3, 4) Since people no de die for heaven, this promise wey Bible give na about this earth.
Wrong idea: Na each person de choose whether e go live for heaven or live for earth.
The truth: Na God de choose who among e faithful Christians go get the prize, “that prize na life for heaven.” (Philippians 3:14) No be we go decide whether we go serve God for heaven or for earth.—Matthew 20:20-23.
Wrong idea: To live for heaven better pass to live for this earth, people wey go live for this earth no good reach people wey de go heaven.
The truth: God de call people wey e go give everlasting life for this earth “my people,” “the people wey I choose,” and “people wey Jehovah don bless.” (Isaiah 65:21-23) They go live forever and they go get the honor to make this earth be paradise as God want for people.—Genesis 1:28; Psalm 115:16; Isaiah 45:18.
Wrong idea: The number, 144,000 wey dey for the book of Revelation de stand for something, no be real number.
The truth: Even though say the book of Revelation get numbers wey stand for something, some of the numbers na real numbers. For example, Bible talk about “the 12 names of the 12 apostles of the Lamb.” (Revelation 21:14) How we know say the number, 144,000 na real number.
Revelation 7:4 talk say “the number of people wey they mark [or, people wey God don choose to live for heaven], na 144,000 people.” The verses around this verse mention another group of people, e call them: “plenty people wey nobody go fit count.” God go still save people wey dey among the “plenty people” wey Bible talk about. (Revelation 7:9, 10) If the number, 144,000 no be real number, but stand for all the people wey God go save, then e no make sense say Bible talk about another group of people wey nobody fit count. a
Apart from that one, Bible talk about the 144,000 say, “they buy them as firstfruit from among people.” (Revelation 14:4) The word “firstfruit” stand for small part of one big group. So e de talk about people wey go rule with Jesus Christ from heaven and they go rule people for this earth.—Revelation 5:10.
a Na the same thing wey Professor Robert L. Thomas talk when e de write about the number, 144,000 wey they mention for Revelation 7:4, e talk say: “This one get exact number, e no be like the one wey dey for Revelation 7:9 wey nobody know the number. If the number stand for something, then no number for the book of Revelation be real number.”—Revelation 1-7: An Exegetical Commentary, page 474.
You May Also Like
ESSENTIAL BIBLE TEACHINGS
Wetin Be the Kingdom of God?
For all the time wey Jesus de preach for this earth, e teach people about the Kingdom of God pass any other thing. For plenty years now, followers of Jesus don de pray say make that Kingdom come.
