Bible talk say, God want make people “no de do any sex wey e hate.” (1 Thessalonians 4:⁠3) Examples of “sex wey [God] hate” as e dey for Bible na, when people wey don marry sleep with other people wey no be their husband or wife, when man sleep with man or woman sleep with woman, and when man and woman sleep with each other and they never marry.

•  Why e dey important to God whether man and woman marry or they no marry?

•  E bad for man and woman to live together before they marry to see if they fit stay together?

•  How husband and wife fit make their marriage strong?

•   Na God start marriage. E start-am when e bring the first man and woman together. (Genesis 2:​22-24) Wetin God want na say, make man and woman marry and make they no leave each other, no be just to stay together for short time.

•   God know the best thing for us. God want make man and woman wey don marry live together forever, because e know say everybody for family go gain from this one. Make we use one small example to explain this one. Just as the small book from person wey make something de help the person wey buy-am to know how to use the thing well, na so God don give us Bible to help us know how we fit succeed for our family. If we follow wetin God want, we go always gain.​—Isaiah 48:​17, 18.

•   When people wey no marry each other do sex, they fit get serious problems. For example, they fit get belle wey they no plan for, they fit get sickness, and they fit de feel bad because of wetin they don do. a

•   God make sex so that man and woman fit use-am born pikin. God de see life as something wey dey holy, and to fit born pikin na special gift from God. Wetin God want na say make only man and woman wey don marry do sex. If we obey God, e go show say we really like that gift.​—Hebrews 13:⁠4.

 For marriage to succeed, no need for man and woman to “live together for some time” before they marry. Instead, the man and woman go need to get strong love for each other, dey ready to stay together, and they go need to work together to solve any problem wey they face. b The promise wey husband and wife de make before they marry de make them want stay for the marriage.​—Matthew 19:⁠6.

 No perfect marriage dey. But husband and wife fit make their marriage strong if they follow the advice for Bible. See some examples:

•   Care for your husband or wife more than yourself.​—1 Corinthians 7:​3-5; Philippians 2:​3, 4.

•   Try to show love and respect for each other.​—Ephesians 5:​25, 33.

•   Make you learn to control wetin you de talk.​—Proverbs 12:⁠18.

•   Dey patient and de forgive quick-quick.​—Colossians 3:​13, 14.