You fit really dey close to God when you de learn about-am and de do things wey go make-am happy. Then God “go come near [you].” (James 4:⁠8) Bible help us dey sure say “[God] no far from each one of us.”​—Acts 17:⁠27.

•  Wetin we must do to fit dey close to God

•  Wrong ideas wey people get about God

 De read Bible

•  Wetin Bible talk: “Everything wey them write for the Word of God, na God use im spirit direct-am.”​—2 Timothy 3:⁠16.

•  Wetin e mean: Na God get Bible. E put wetin dey im mind for the mind of the people wey write Bible. God use this special book tell us the way e want make we live our life. E don still show us the fine-fine characters wey e get like love, pity, and to de judge for the correct way.​—Exodus 34:6; Deuteronomy 32:⁠4.

•  Wetin you fit do: De read Bible everyday. (Joshua 1:⁠8) Think about wetin you don read and ask yourself say: ‘Wetin this one teach me about the kind Person wey God be?’​—Psalm 77:⁠12.

   For example, read Jeremiah 29:​11, and then ask yourself say: ‘Wetin God want for me​—peace or problem? Na God wey no de forgive person, or e want make I get better future?’

 Take time look the things wey God make

•   Wetin Bible talk: “[God] character them wey eye no fit see dey clear to see from when e make the world, because we fit learn about this character them from the things wey e make.”​—Romans 1:⁠20.

•  Wetin e mean: The things wey God make wey eye fit see de show some of the fine character wey e get, just as the work wey artist do de show people the kind person wey e be. For example, the wonderful way wey human being brain de work and the things wey e fit do, de show the deep sense wey God get. And the kind power wey the sun and other stars get, de show say God really get power well-well.​—Psalm 104:24; Isaiah 40:⁠26.

•  Wetin you fit do: Take time to look and learn about the things wey God make wey dey around you. As you de do this one, ask yourself say, ‘Wetin this wonderful things wey God create de tell me about the kind person wey God be?’ a Na true say the things wey God make no fit teach us everything about God. That na the reason why God give us Bible.

 De use God name

•  Wetin Bible talk: “I go protect-am because e know my name. E go call me, and I go answer-am.”​—Psalm 91:​14, 15.

•  Wetin e mean: God wey im name na Jehovah, de really notice people wey know im name and de use im name with respect. b (Psalm 83:18; Malachi 3:16) As God tell us im name, e show say e want make we know-am. E talk say, “I be Jehovah. Na my name be that.”​—Isaiah 42:⁠8.

•  Wetin you fit do: De use Jehovah name when you de talk about-am.

 Talk to Jehovah for prayer

•  Wetin Bible talk: “Jehovah near all the people wey de call im name.”​—Psalm 145:⁠18.

•  Wetin e mean: Jehovah dey near people wey de pray to-am and wey trust say e go answer their prayer. Prayer na part of our worship wey show say we get deep respect for God.

•  Wetin you fit do: De always pray to God. (1 Thessalonians 5:17) De tell-am wetin de worry you and how you de feel.​—Psalm 62:⁠8. c

 Do wetin go help you get faith for God

•  Wetin Bible talk: “If faith no dey, e no dey possible to really do wetin God like.”​—Hebrews 11:⁠6.

•  Wetin e mean: To fit near Jehovah, we must get faith for-am. For Bible, to get faith for God pass to just believe say God dey. E still mean say we go use all our heart trust say the things wey e don promise go happen and say im laws dey correct. To fit get better friendship with another person, you must trust that person.

•  Wetin you fit do: True faith de come from wetin person know. (Romans 10:17) So study Bible and prove-am to yourself say you fit trust God and the advice wey e de give. Jehovah Witness go dey happy to study Bible with you. d

 Do wetin go make God happy

•  Wetin Bible talk: “To show say we love God, we go de do the things wey e command us.”​—1 John 5:⁠3.

•  Wetin e mean: Jehovah dey near people wey de show say them love-am as them de do their best to obey im commands.

•  Wetin you fit do: As you de study the Bible, notice wetin God no like and the things wey e like. Ask yourself say, ‘Wetin I fit adjust for my life to fit make God happy?’​—1 Thessalonians 4:⁠1.

 God go care for you as you de follow im advice

•  Wetin Bible talk: ‘You go see-am for your life say [God] dey good.’​—Psalm 34:​8, The Bible in Basic English.

•  Wetin e mean: God want make you yourself come see how e good reach. When you see how e love you and de support you, you go want near-am more-more.

•  Wetin you fit do: As you de read Bible, follow the advice wey God de give and enjoy the gain wey de come from-am. (Isaiah 48:​17, 18) Still think about people wey solve problems wey them face, wey make their life and the life of their family better, and start to really dey happy because them follow God advice. e

 Wrong idea: We no fit know God because e dey hard to understand.

 Truth: Some things about God dey wey no easy to understand as e be say na Spirit e be. Even with this one, we fit still know God. In fact, Bible talk say we need to know God to fit get everlasting life. (John 17:⁠3) For way wey we go fit understand, Bible tell us about the Person wey make us, im fine-fine character, wetin e get for mind for human being and for this earth, and the things wey e de see as good or bad. (Isaiah 45:​18, 19; 1 Timothy 2:⁠4) And as we don talk, Bible still help us know God name. (Psalm 83:18) So we fit know God and still dey close to-am.​—James 4:⁠8.