God honor us as e give us the freedom to decide wetin we want do. This freedom na the power to make our own decision, no be say God don arrange everything wey go happen for our life. See wetin Bible teach about this matter.

•   God make man for im image. (Genesis 1:26) We no be like animals wey de do things as body move them. But, we resemble our God wey create us as we fit de show better-better character like love and to judge for correct way. And like our our God wey create us, we get the freedom to choose wetin we want do.

•   The way our future go be dey our hand, even though say wetin person no expect fit happen. Bible encourage us to “choose life . . . [and] listen to [God] voice,” wey mean to de obey im command. (Deuteronomy 30:19, 20) If we no get freedom to do wetin we want do, you think say wetin this Bible verse de talk for make sense? No. E for even mean say God wicked. But instead of God to force us to obey-am, e sofri beg us say: “If only you go listen to the things wey I command you! Na that time you go get peace like river.”—Isaiah 48:18.

•   No be God de choose who go succeed or fail for life. If we want succeed for anything wey we de do, we must work hard. Bible talk say: “Anything wey you fit do, make you do-am with all your power.” (Ecclesiastes 9:10) Bible still talk say: “When people work hard, their plans go surely succeed.”—Proverbs 21:5.

 The freedom to choose wetin we want do na better gift from God, this one de help us love God with “all [our] heart” because na wetin we want.—Matthew 22:37.

 Bible de teach say God na Almighty, this one mean say nobody fit stop-am to use im power and nobody get power reach-am. (Job 37:23; Isaiah 40:26) But e no de use im power control everything. For example, Bible talk say God continue to “hold [imself]” make e no punish Babylon for olden days, wey be enemy of im people. (Isaiah 42:14) For the same way, for now, God de hold imself make e no punish people wey de use their freedom do other people bad. But God no go hold imself forever.—Psalm 37:10, 11