To get better friend na something wey fit help us succeed for life and dey happy. Good friends de help each other to get good character and still de help each other to be better person.​—Proverbs 27:17.

 Bible help us see say e really dey important make we dey careful when we de choose our friends. E still warn us about the bad things wey fit happen if we get bad friends. (Proverbs 13:20; 1 Corinthians 15:33) Bad friends fit make person to make bad decision or them fit even spoil person better character.

For this article

•  Wetin de make person be good friend?

•  Some example of good friendship for Bible

•  Person fit be God friend?

•  Bible verses wey talk about friendship

 Bible teach us say to get better friend pass say two people go like the same thing. For example, Psalm 119:63 talk say: “I be friend to everybody wey e de fear you a and all the people wey them de obey your law.” Notice say the person wey write this Bible verse talk say, e go choose friends wey de fear to do wetin go make God vex, and wey really want live life the way God want.

 Bible still talk about the better character wey good friend go get. For example:

•   “Real friend de show love all the time, and na brother wey you fit trust when problem dey.”​—Proverbs 17:17.

•   “Friends dey wey ready to cause wahala for theirself, but one friend dey wey dey close pass brother.”​—Proverbs 18:24.

 This Bible verse them help us see say good friend no de leave im friend, e de show love, dey kind, and get open hand. True friend de happy with us when things de go well and de support us when we get problem for life. True friend na person wey get mind to correct us when we de do something wey no good or when we want make bad decision.​—Proverbs 27:6, 9

 Example of good friendship dey Bible. This friendship na between people wey dey different age, wey come from different background, wey get different culture and wey get authority pass each other. Make we talk about three of this kind friendship.

•   Ruth and Naomi. Ruth na Naomi daughter-in-law, and e fit be say Naomi old pass Ruth well-well. Another thing be say, Naomi and Ruth no get the same background or culture. Even with all this one, them still come be close friends wey love each other well-well.​—Ruth 1:16.

•   David and Jonathan. Even though say Jonathan senior David with 30 years, Bible talk say David and Jonathan “come be very tight friends”​—1 Samuel 18:1.

•   Jesus and im apostles. As teacher and master, Jesus get authority pass im disciples. (John 13:13) Even with that one, Jesus no feel say im disciples no reach to be im friends. Instead, Jesus come be tight friend to people wey de do wetin e teach. E talk say: “I don call una my friends because I don tell una everything wey I hear from my Papa.”​—John 15:14, 15.

 Yes, e dey possible for people to be God friend. Bible talk say: “E de make righteous person im tight friend.” (Proverbs 3:32) This one mean say God de choose people wey no de live bad life, wey de talk true, wey get respect, and wey de try to live their life the way e want, to be im friends. For example, Bible help us see say because Abraham get faith, God call-am im friend.​—2 Chronicles 20:7; Isaiah 41:8; James 2:23.