Yes, God go forgive you if you do the correct thing. Bible talk say God “ready to forgive” and say “e go open hand to forgive” you. (Nehemiah 9:​17; Psalm 86:5; Isaiah 55:7) When God forgive us, e de forgive finish. So e de “wipe [our] sins comot.” (Acts 3:​19) Bible talk say: “I no go remember their sin again.” This one mean say God de forgive and E no de look back. (Jeremiah 31:34) After God don forgive us, e no de use the sin punish us again.

 The reason wey make God de forgive us no be because say e too weak or say na because e no get the power to punish us. E no de change mouth for wetin e de see as good or bad. Because of this one, God no de forgive some sin.—Joshua 24:​19, 20.

Things wey you need to do so that God go forgive you

1.   Agree say you don sin against God. Na true say wetin you do fit don pain other people, but you must know say the sin na something wey bad for God eye.—Psalm 51:​1, 4; Acts 24:16.

2.   Pray to God and confess your sin.—Psalm 32:5; 1 John 1:9.

3.   Really feel bad for the sin wey commit. If you do like that, e mean say you “dey sad for the way God want” and this one fit help you repent. (2 Corinthians 7:​10) To repent still mean say you regret the things wey you do wey make you sin.—Matthew 5:​27, 28.

4.   You go need to stop to do the bad things wey you de do before. (Acts 3:​19) This one fit mean say you go need to stop that bad thing wey you de do, or even change the way you de think and do things kpatakpata.—Ephesians 4:​23, 24.

5.   Do things wey go repair or solve the problem wey you don cause. (Matthew 5:​23, 24; 2 Corinthians 7:​11) Beg people wey suffer because of the bad thing wey you do or because you no do wetin you suppose do. And make you do your best to pay anything wey you need to pay back.—Luke 19:​7-​10.

6.   Beg God for prayer make e forgive you because Jesus die for your sin. (Ephesians 1:7) If you want make God answer your prayer, you must forgive people wey do you bad.—Matthew 6:​14, 15.

7.   If na serious sin you commit, talk to the elders because na them go fit pray for you and help you make your friendship with God strong again.—James 5:​14-​16.

Some things wey people believe about forgiveness wey no correct

 “If I confess to priest or pastor, e go forgive my sin.”

 No human being get the power to forgive sin wey person sin against God. Na true say when person confess im sin, this one fit help-am make im friendship with God strong again and make im mind come down, but na only God de forgive sin wey person commit against-am.—Ephesians 4:​32; 1 John 1:​7, 9.

 If na so e really be, wetin Jesus mean when e tell im disciples say: “If una forgive anybody im sin, them don forgive-am; if una no forgive anybody im sin, them no go forgive-am too”? (John 20:23) Jesus de talk about the special authority wey e go give im apostles when them receive holy spirit.—John 20:22.

 Just as Jesus promise im apostles, them receive this authority for the year 33 C.E. when them receive holy spirit. (Acts 2:​1-4) Na this authority apostle Peter use judge Ananias and Sapphira. Jehovah use im holy spirit make Peter know the wayo wey Ananias and Sapphira do. And the way Peter judge the matter show say God no forgive their sin.—Acts 5:​1-​11.

 After the last apostle die, God stop to give people that kind power and authority to judge, heal, and to speak different-different language. (1 Corinthians 13:​8-​10) So nobody for this our time get the power to forgive people sin wey them commit against God.