Bible give us correct advice wey fit help us when we want make decision. E fit help us “get better sense and de understand things.” (Proverbs 4:5) Sometimes, Bible de tell us wetin be the best decision. But for other time, Bible still de give us advice wey fit help us make better decision.

For this article

•  Things wey fit help you make good decision

•  Make I change decision wey I don already make?

•  What if I make bad decision wey I no fit change?

•   No rush to make decision. Bible talk say: “Wise person de think well before e do something.” (Proverbs 14:15) If you rush to make decision, you fit no put mind for important information wey you need. Take time think well about the different-different choice wey you get.​—1 Thessalonians 5:21.

•   No let how you de feel affect the decision wey you want make. Bible warn us say we no fit trust our heart every time. (Proverbs 28:26; Jeremiah 17:9) For example, we fit no make better decision when we de vex, when life don tire us, when we no dey happy at all, when we no dey patient, or even when we don really tire.​—Proverbs 24:10; 29:22.

•   Pray for better sense. (James 1:5) God de happy to answer that kind prayer. God na Papa wey de care for im children and e no want make them enter any problem. “Na Jehovah de give sense. Knowledge and deep sense de come from e mouth.” a (Proverbs 2:6) Na im Word wey be Bible be the main thing wey e de use give us this sense.​—2 Timothy 3:16, 17.

•   Do research. If we want make good decision, we need the kind information wey we fit trust. As Bible talk, “the person wey get sense go listen and learn more.” (Proverbs 1:5) Where you fit find better information wey you fit trust?

   First of all, check wetin Bible talk for the matter wey you de think about. Because na God create us, e know wetin good pass for us, and na for im Word we go get advice wey we fit trust well-well. (Psalm 25:12) For some decision, Bible give clear direction, and e fit be like law or command. (Isaiah 48:17, 18) But for plenty other matter, Bible no de go direct. Instead, e de use advice guide us. This advice fit help us make better decision even if e different from another person decision. To find Bible verses wey fit help you, do research with articles or our books, like the ones wey dey this website. b

   For some decision, you fit need to check other places wey them fit trust for information. For example, before you buy something, especially something wey cost well-well, e go make sense to do research about the thing wey you want buy and the company wey make-am. You still need to check wetin fit happen if you want return- am or the time wey you get to fit return-am if e spoil. And you still need to make sure say the thing na exactly wetin you need.

   Bible talk say, “when we no talk to other people, plans no go work.” (Proverbs 15:22) So before we make decision, talk to people wey you trust. For example, e go make sense to talk to doctor when you want make decision wey concern health matter. (Matthew 9:12) Sometimes, you fit talk to person wey don face the kind situation wey you de face. Remember say na you, no be the people wey you meet for advice go make the decision and live with the result.​—Galatians 6:4, 5.

•   Check all the information wey you get. Base on the information wey you don get write list of things wey you fit choose from, check their good side and bad side and take time think about wetin fit be the result of your decision. (Deuteronomy 32:29) For example, how your decision fit affect you, your family, or other people? (Proverbs 22:3; Romans 14:19) If you answer this question and de think about Bible advice, you go fit make better decision.

•   Make the decision. Sometimes, we fit de fear to make decision because we no really dey sure whether e go work. But if we no make the decision, we fit miss better opportunity or we fit find ourself for situation wey we no like. To talk-am for another way, when person no make decision, e fit still be the same thing as when e make bad decision. Bible use word wey concern farm explain-am when e talk say: ‘If you de wait make the wind and weather dey fine, you no go fit plant or harvest anything.’​—Ecclesiastes 11:4, Good News Translation

 Still remember say, even the best decision fit no be perfect one. Many times, when we choose to do one thing, we fit need to leave the other one. Another thing be say, things wey we no expect fit happen. (Ecclesiastes 9:11) So use the best information wey you see, and choose the one wey you know say e fit work well.

 No be all decison you no go fit change. Your situation fit change, or you fit come know say the decision wey you first make get result wey you no expect. So, e go really make sense to think about the situation again and choose the one wey fit bring better result.

 But some decision still dey wey you no go change. (Psalm 15:4) For example, God want make people wey don marry keep the promise wey them make for their marriage. c (Malachi 2:16; Matthew 19:6) When problem come for their marriage, make them do everything to settle the problem and no end the marriage.

 Sometimes, all of us de make bad decision or decision wey no make sense. (James 3:2, footnote) E fit even make us regret or feel bad, and this one dey normal. (Psalm 69:5) Sometimes this kind feeling na good thing if we allow-am make e help us no do the same mistake again! (Proverbs 14:9) But Bible advice us say make we no feel bad sotey we tire and we no fit de think well. (2 Corinthians 2:7) d Bible talk say, “Jehovah de show mercy and pity.” (Psalm 103:8-13) So, if you make bad decision wey you no fit change, try learn from-am and do everything wey you fit to make the situation better.