The word “Good Samaritan” na word wey them de always use describe person wey de help people. This word na from one story or parable wey Jesus talk, to show say good neighbor na person wey sabi pity people and help them no matter their skin color or place wey them from come. a

For this article

•  Wetin be the story of the “Good Samaritan”?

•  Why Jesus talk this story?

•  Wetin we fit learn from this story?

•  Who be Samaritan people?

•  The story about the “Good Samaritan” really happen?

Make we talk about the story small: One man wey be Jew de travel from Jerusalem go Jericho. As e de go for road, robbers attack-am, them beat-am sotey e almost die.

One priest wey be Jew, and later another person wey be leader for Jew religion waka pass the man wey robbers attack. Even though say them come from the same place with the man, them no stop to help-am.

At last, one man wey come from another place de pass the road. The man na Samaritan. (Luke 10:33; 17:16-18) The Samaritan show pity for the man wey robbers attack and e treat the man wound. After, the Samaritan carry the man go one place wey them go fit take care of-am. For there, e care for-am the whole night. The next day, e pay the person wey get the place to care for the man and e agree to pay for any other thing wey they go still need to fit treat the man.​—Luke 10:30-35.

Jesus tell this story to one man wey de think say na only people wey them come from the same place or religion be im neighbors. Jesus want teach the man important lesson say person “neighbor” no be only people wey them be Jew. (Luke 10:36, 37) Them write this story for Bible so that anybody wey want really make God happy go fit gain from-am.​—2 Timothy 3:16, 17.

This story teach us say person wey be good neighbor de use the things wey e de do show say e get pity, no be just for mouth. This person de do something to help person wey de suffer no matter where e come from, e skin color or im country. Better neighbor de treat other people the way e go like make them de treat-am.​—Matthew 7:12.

Samaritan people de live for the land wey dey the north side of Judea. Them be the children of Jew people and people wey no be Jews wey marry each other.

For apostles time, the Samaritan people don get their own religion. They accept the first five books for Bible, but them reject the other books.

Many Jews for Jesus time no like Samaritan people and them no de do things with them. (John 4:9) Some Jews de use the word “Samaritan” take insult person.​—John 8:48.

Bible no talk anything wey show say the story about the Samaritan really happen. Many times Jesus de use things about tradition and places wey people know well-well when e de teach, so that people wey de listen to-am go fit understand wetin e de teach.

Many things wey Jesus talk for the story dey correct. For example:

• The road from Jerusalem to Jericho long pass 20 kilometers (12 mi) and the area wey slope go down reach 1 kilometer (0.6 mi). Bible dey correct when e talk say people wey de travel go Jericho de waka go down.​—Luke 10:30.

• Priest and Levites wey de stay Jericho de always pass this road when them de travel go Jerusalem.

• Robbers de always hide for some areas for this road so that them go fit attack people wey de travel, especially person wey de travel alone.