Pikin them wey don grow get the important work to care for their papa and mama wey don old. Bible talk say children wey don grow suppose show say them de “follow their religion well as them de care for their family and this one go show say them de pay their papa and mama back for wetin they don do . . . , because this one go make God happy.” (1 Timothy 5:​4, New International Version) Children wey don grow de show say them de obey the command to respect their papa and mama, when they care for their papa and mama wey don old.​—Ephesians 6:​2, 3.

 Bible no tell us exactly how we go care for our papa and mama wey don old. But e give us example of men and women of faith wey care for their old papa and mama. E still give advice to help people wey de care for their old papa and mama.

•  How some people for family don care for their old papa and mama for Bible time?

•  Which better advice from Bible fit help people wey de care for their papa and mama?

•  Bible talk say children must care for their papa and mama for their own house or for the house of their papa and mama?

 They do this one for different ways, and e depend on the situation.

•   Joseph de stay far from e old papa, Jacob. When Joseph get the chance, e arrange make e papa come de stay near where e dey stay. Joseph give e papa house, food, and e protect e papa.​—Genesis 45:​9-11; 47:​11, 12.

•   Ruth move go the country of e mother-in-law and e work hard to care for e mother-in-law.​—Ruth 1:16; 2:​2, 17, 18, 23.

•   Jesus, before e die, e choose person to care for e mama, Mary, e fit be say that time the husband of Mary don die.​—John 19:​26, 27. a

 E fit no easy to care for our old papa and mama, but Bible fit help us cope when we de face that kind situation.

•   Honor your papa and mama.

   Wetin Bible talk: “Honor your papa and mama.”​—Exodus 20:⁠12.

   How we fit follow this advice for Bible? You fit show honor to your papa and mama as you de allow them to control their life as they fit. If e dey possible, allow them decide how they want make the children de care for them. Even with this one, make you show say you honor them as you de try your best to do wetin you fit do to help them.

•   Try understand them and de forgive them.

   Wetin Bible talk: “Na the deep sense wey person get, go make the person no vex quick. And na fine thing if the person no look the bad wey other people do.”​—Proverbs 19:⁠11.

   How we fit follow this advice for Bible? If your old papa or mama talk something wey you no like or e no show say e like the care wey you de give, ask yourself say, ‘How I go feel if na me dey for this situation?’ When you de try to understand them and de forgive them, e go help make the situation no worse pass as e dey.

•   Ask other people for advice.

   Wetin Bible talk: “When we no talk to other people, plans no go work, but when plenty people dey wey de give advice, we go succeed.”​—Proverbs 15:⁠22.

   How we fit follow this advice for Bible? Do research to see how you fit manage the sickness wey your papa or mama fit get. Check for your area to see wetin government fit do to help you care for your papa and mama. Talk with some people wey don care for old papa and mama. If you get brothers and sisters, make wuna do family meeting to discuss how wuna go care for wuna papa and mama.

•   Know where you fit do reach.

   Wetin Bible talk: “Person wey get sense no de do pass e self.”​—Proverbs 11:⁠2.

   How we fit follow this advice for Bible? Know wetin you fit do and wetin you no fit do. For example, nobody get all the time and all the power. This one fit affect wetin you fit do to care for your papa and mama. If wetin you want do pass your power, tell other people for your family or people wey know how to handle this kind situation to help you.

•   Take care of yourself.

   Wetin Bible talk: “Person no de hate e own body, but e de chop and sofri take care of e body.”​—Ephesians 5:⁠29.

   How we fit follow this advice for Bible? Even as you get work to care for your papa and mama, you still need to care for your own family if you don marry. Make you de chop well. De rest and sleep well. (Ecclesiastes 4:⁠6) Try de take some time to relax. If you do this things e go help you to care for your papa and mama well.

 Bible no talk anything about whether children wey don grow must care for their papa and mama for their own house or for the house of their papa and mama. Some families de decide to keep their old papa and mama to continue to stay for their own house or the house of their papa and mama if e dey possible. For area wey place dey wey them de care for old people, some families don decide say the best thing na to keep their old papa and mama for there so that they go care for them. The family fit do meeting together to decide wetin go good pass for the papa and mama and for people wey go care for them.​—Galatians 6:​4, 5.