How Jesus Be?
The answer wey Bible give
Nobody know how Jesus really look like, because Bible no talk how Jesus be for body. This one mean say the way Jesus dey for body no really dey important. But Bible give us idea of how Jesus Jesus be.
How e look like: Since the mama of Jesus na Jew, e fit be say Jesus look like Jew people. (Hebrews 7:14) E fit be say e no dey different from other people for body. One time e travel from Galilee to Jerusalem and people no know say na Jesus e be. (John 7:10, 11) And e no even dey different from e close disciples. Remember say na Judas Iscariot even show Jesus to the group of people wey carry sword come to arrest Jesus.—Matthew 26:47-49.
How e hair long reach: We no get doubt say Jesus no keep long hair, because Bible talk say “long hair na shame to man.”—1 Corinthians 11:14.
E beard-beard: Jesus keep beard-beard. Jesus follow the law of Jew people wey talk say make men no change the shape of their beard-beard. (Leviticus 19:27; Galatians 4:4) And too, when Bible de talk about the things wey Jesus go suffer, e mention e beard-beard.—Isaiah 50:6
E body: Plenty things dey to prove say Jesus get body. E travel long distance when e de preach. (Matthew 9:35) Two times e clean the Jew people their temple, e push the tables of the people wey de change money and the money throway, and one time, e use cane drive animals comot from the temple. (Luke 19:45, 46; John 2:14, 15) McClintock and Strong’s Cyclopedia talk say: “The whole story about Jesus for Bible show say Jesus be dey strong for body.”—Volume IV, page 884.
The way e face be: Jesus na person wey e like people and de feel for people and this one show for e face. (Matthew 11:28, 29) Different kinds of people de come meet Jesus make e comfort and help them. (Luke 5:12, 13; 7:37, 38) Even pikin them like to dey around Jesus.—Matthew 19:13-15; Mark 9:35-37.
Wrong ideas wey people get about how Jesus be
Wrong idea: Some people de argue say e fit be say Jesus come from Africa because the book of Revelation talk say e hair be like wool and e legs be like “shinny bronze.”—Revelation 1:14, 15, The New Jerusalem Bible.
The truth: They “use signs” talk wetin dey the book of Revelation. (Revelation 1:1) The language wey Bible use to talk about the hair and the leg of Jesus no be direct language. And they use this language to talk about the qualities wey e get after e come back to life, no be how e be when e dey this earth. When the book of Revelation 1:14 talk say Jesus “head and e hair white like white wool, like snow,” e use color to talk about the hair, no be how soft or strong the hair be. This one show the kind sense wey Jesus get because of e age. (Revelation 3:14) This verse no de talk say the hair of Jesus soft like wool or dey like snow
The leg of Jesus “be like fine copper when e de shine inside fire.” (Revelation 1:15) And, e face be “like sun when e de really shine.” (Revelation 1:16) Since no group of people get this kind skin color wey Bible talk here, this vision na sign, and e de show Jesus “wey de stay for light wey nobody fit near-am” after e don come back to life.—1 Timothy 6:16.
Wrong idea: Jesus dey weak and no get power.
The truth: Jesus do things with strong heart like man. For example, when one group of people carry sword to come arrest Jesus, e no fear to show e self to them. (John 18:4-8) For Jesus to work as carpenter and to use the things wey carpenters de use with their hands to work, show say Jesus get power.—Mark 6:3.
So, why Jesus need make person help carry the pole wey they use kill Jesus ontop? And why Jesus die before the other people wey they nail them together die? (Luke 23:26; John 19:31-33) Just before Jesus die, e don really dey weak. E no sleep the whole night, because wetin e think about make-am feel pain. (Luke 22:42-44) For night Jew People treat Jesus for bad way, and for morning Rome people suffer Jesus. (Matthew 26:67, 68; John 19:1-3) E fit be say na this things make Jesus die quick.
Wrong idea: Jesus always dey dull and sad.
The truth: Jesus show the qualities wey e Papa for heaven, Jehovah, get wey Bible talk say na “happy God.” (1 Timothy 1:11; John 14:9) The truth be say Jesus teach people how they fit dey happy. (Matthew 5:3-9; Luke 11:28) All this things show say Jesus de always show for e face say e be happy person.
You May Also Like
ESSENTIAL BIBLE TEACHINGS
How We Know Say Wetin Bible Talk Na True?
If Bible na word of God, e mean say no other book wey people write fit ever be like Bible.
