How We Fit Pray—The Lord’s Prayer Na the Best Way to Pray?
The answer wey Bible give
The Lord’s Prayer de guide us for how we go pray and wetin we go pray about. Jesus use the prayer answer e disciples when them ask-am say “Lord, teach us how to pray.” (Luke 11:1) But the Lord’s Prayer or the Our Father prayer no be the only prayer wey God de hear. a Instead, Jesus use-am show example of the kind prayer wey God de accept.
For this article
Wetin dey the Lord’s Prayer?
For the Lord’s Prayer as e dey for Matthew 6:9-13, the word wey them use no be the same for different-different Bible translation. Make we talk about two example.
New World Translation: “Our Papa wey dey heaven, make your name dey holy. Make your Kingdom come. Make wetin you want happen for this earth as e dey for heaven. Give us our bread for today, and forgive us wetin we de owe you, as we don forgive people wey de owe us. And make you no allow us fall for temptation, but save us from the wicked person.”
King James Version: “Our Father which art in heaven, hallowed be thy name. Thy kingdom come. Thy will be done in earth, as it is in heaven. Give us this day our daily bread. And forgive us our debts, as we forgive our debtors. And lead us not into temptation, but deliver us from evil.” b
Wetin the Lord’s Prayer mean?
The things wey Jesus teach agree with other things wey them write for Bible, so we fit expect say the other parts for Bible go fit help us understand the meaning of the Lord’s Prayer.
“Our Papa wey dey heaven”
E dey correct to call God “Our Papa” because na e make us and give us life.—Isaiah 64:8.
“Make your name dey holy”
We must respect God name wey be Jehovah and treat-am as holy. We de help to make God name dey holy when we de talk about e character and tell other people about the things wey e get for mind to do.—Psalm 83:18; Isaiah 6:3.
“Make your Kingdom come”
God Kingdom na government for heaven and na Jesus be the King. Jesus teach us make we pray for that government to come rule the whole earth.—Daniel 2:44; Revelation 11:15.
“Make wetin you want happen for this earth as e dey for heaven”
Just as evil or death no dey heaven, wetin God want na make people get peace and live forever for this earth where nothing go de make them fear.—Psalm 37:11, 29.
“Give us our bread for today”
For Jesus time, bread na food wey dey important. Make we remember say we need our Creator to give us the things wey we need to fit dey alive.—Acts 17:24, 25.
“Forgive us wetin we de owe you, as we don forgive people wey de owe us”
For this place, “owe” na another word wey mean sin. (Luke 11:4) All of us need forgiveness because we de sin. But if we want make God forgive us, we must dey ready to forgive other people wey sin against us.—Matthew 6:14, 15.
“Make you no allow us fall for temptation, but save us from the wicked person”
Jehovah God no de ever tempt us to do wetin bad. (James 1:13) But the person wey de tempt us na “the wicked person” wey be Satan the Devil—wey them still de call ‘Devil wey de tempt person’. (1 John 5:19; Matthew 4:1-4) We de beg Jehovah make e help us to fit de obey-am when Devil tempt us to do wetin bad.
To de repeat the Lord’s Prayer na the only way to pray?
Jesus give us the Lord’s Prayer as example. When we de pray, we no need to de repeat-am word for word. Before Jesus give the Lord’s Prayer as example, e warn say: “When una de pray, make una no de repeat the same words again and again.” (Matthew 6:7) Another time when Jesus de teach people how to pray, e use different word talk the prayer.—Luke 11:2-4.
The best way to pray na to tell God wetin we de think for our mind and how we de feel.—Psalm 62:8.
How we suppose pray?
The Lord’s Prayer na better example of how we fit pray make God hear us. See how e agree with other Bible verses wey talk about prayer.
Na only God we go pray to
Bible verse: “But for everything, make una de pray and de really beg God for help and still de thank-am. Make una de tell God the things wey de worry una.”—Philippians 4:6
Wetin e mean: We suppose to de pray give God—no be Jesus, Mary, or saint. The word wey be “Our Father” wey start the Lord’s Prayer teach us say, na only Jehovah we suppose pray to.
Pray for things wey agree with wetin God want
Bible verse: “Anything wey we beg-am for, wey agree with wetin e want, e de hear us.”—1John 5:14.
Wetin e mean: We fit pray about anything wey agree with wetin God want. Jesus teach us how wetin God want dey important reach as e put-am join the Lord’s Prayer, e say: “Make wetin you want happen.” We fit learn about wetin God want for this earth and for humans when we de study Bible.
Pray for the things wey you need
Bible Verse: “Throw all your worry to Jehovah, and e go support you.”—Psalm 55:22.
Wetin e mean: God de care about the things wey we need. Just as Jesus put other things wey person need for the Lord’s Prayer, we fit pray for the things wey we need to survive, for help when we want make important decision, for support when we de face problem and for God to forgive us our sin. c
a For example, e get other times wey Jesus and im disciples pray, but them no use the same words wey them use for the Lord’s Prayer.—Luke 23:34; Philippians 1:9.
b The King James Version end the Lord’s Prayer with: ‘Na you get the kingdom, and the power, and the glory, for ever. Amen.’ Them know this words wey them use praise God as doxology and e still dey other Bibles. But The Jerome Biblical Commentary talk say: ‘The doxology no dey the [manuscripts] wey them fit really trust.’
c E fit no easy for people wey know say them need God to forgive their sin to pray, because their conscience de worry them for sin wey them don commit. But Jehovah de tell this kind people say: “Come make we settle the matter wey dey ground.” (Isaiah 1:18) E no go reject anybody wey use all im heart beg for forgiveness.
You May Also Like
ESSENTIAL BIBLE TEACHINGS
God De Hear All Prayers?
What if person de pray to do bad thing? What if for house, husband treat e wife for bad way, and e later pray for the blessing of God?
ABOUT US
Go Meeting
Learn about wetin we de do for our meetings. Find the place wey we de do our meeting for your area.