Bible talk about things wey go happen and how people go de behave wey go show say “we dey the last days of this world,” or “the end of the world.” (Matthew 24:3; King James Version) Bible call the period of time wey all this things go de happen, “last days” or “end times.”​—2 Timothy 3:1; Daniel 8:19; Easy-to-Read Version.

 Bible talk about many things wey go happen for the same time wey go show say we dey for last days. (Luke 21:7) See some example:

 War go de happen well-well. Jesus talk say “nation go de fight nation, and kingdom go de fight kingdom.” (Matthew 24:7) For the same way, Revelation 6:4 still talk about one horseman wey represent war and go “comot peace from the earth.”

 Hunger. Jesus talk say “food no go too dey.” (Matthew 24:7) The book of Revelation still talk about another horseman wey go make serious hunger dey for different-different place for this world.​—Revelation 6:5, 6.

 Ground go de shake open well-well. Jesus talk say “ground go de shake open for different-different place.” (Matthew 24:7; Luke 21:11) This things wey go happen around the world go cause more suffer and plenty people go die pass before.

 Sickness. Jesus talk say serious disease and “bad-bad sickness wey go de spread go dey.”​—Luke 21:11.

 Bad-bad things wey de happen. Na true say bad-bad things don de happen for many-many years now. But Jesus still talk say for last days, “wicked things go de plenty more-more.”​—Matthew 24:12.

 People de spoil the earth. Revelation 11:18 talk say “people [go] de spoil the earth.” Them go de do-am for different-different way, no be only say them go de do bad-bad things but them go still de spoil the earth.

 Bad-bad character. For 2 Timothy 3:​1-4, Bible talk how people for this world go be. E say: “Them no go de talk thank you, no go de hold people tight, . . . them no go want get any agreement with people, go de lie to spoil the name of another person, no go de control theirself, them go really wicked, them go hate good thing, them go turn against their friends, them go de do strong-head, them go de carry body up.” People go really de show this kind character for this our time sotey, e go dey correct to talk say this na time wey be “serious hard time wey no go dey easy to handle.”

 Family members no go dey close to each other. For 2 Timothy 3:2, 3, Bible talk say people “no go get normal human feeling” for their family and children “no go de obey papa and mama.”

 People love for God go de go down. Jesus talk say “the love wey most of the people get go de go down.” (Matthew 24:12) Wetin Jesus mean na say, the love wey many people get for God go de go down. 2 Timothy 3:4 still talk say for last days, this kind people “go like enjoyment instead of to love God.”

 People go de pretend say them de serve God. For 2 Timothy 3:5, Bible talk say people go de pretend say them de serve God, but them no de follow wetin God talk for the way them de live their life.

 People wey de worship God go understand the prophecies for Bible pass before. Bible talk for the book of Daniel say for ‘the time of the end’ many people go understand the things wey Bible talk pass before, and they go even understand the prophecies for Bible for the correct way.​—Daniel 12:4.

 Them go preach for the whole world. Jesus talk say “them go preach this good news of the Kingdom for the whole world.”​—Matthew 24:14.

 Many people go show say them no care about the signs and them go take-am do yeye. Jesus talk say many people no go care about all the sign wey really de show say the end don near. (Matthew 24:37-39) Even 2 Peter 3:3, 4 talk say some people go de use all this sign do yeye because e no mean anything to them.

 All the things wey Bible don talk go happen. Jesus talk say as all this things de happen for the same time and no be just some of them, this one de show say we de live for the last days.​—Matthew 24:33.

 Yes. The things wey de happen for this world and wetin Bible don talk show say the last days start for 1914 and na that year World War I start. To see how the things wey de happen for this world today show say we de live for the last days, watch this video:

 For 1914, God Kingdom start to de rule for heaven, and the first thing wey e do na to pursue Satan and e demons comot for heaven come this earth and na for only this earth them fit de do things. (Revelation 12:7-12) Wetin Satan de do de show for the way people de behave and the bad-bad things wey them de do and all this one really make the last days “serious hard time wey no go dey easy to handle.”​—2 Timothy 3:1.

 Many people don really tire because things no really dey easy to handle. Them de worry say people no know how to live with each other again. Some even de fear say for future human being go destroy each other.

 But other people wey still de worry about the things wey de happen for this world get better hope for the future. Them dey sure say God Kingdom go soon do something to remove all the problems wey dey this world. (Daniel 2:44; Revelation 21:3, 4) Them dey patient and them de wait for the time wey God go do wetin e don promise and wetin Jesus talk de make their mind come down when e say: “But the person wey don endure reach the end, them go save-am.”​—Matthew 24:13; Micah 7:7.