After God make the first man and woman, e join them together for marriage. God make marriage to be special connection between one man and one woman, and na better condition to start family for them and their children.​—Genesis 1:27, 28; 2:18.

 God want make husband and wife dey happy. (Proverbs 5:18) For Bible God talk how marriage suppose be and e still give advice wey fit help marriage succeed.

For this article

•  How God want make marriage be?

•  Wetin Bible talk about separation and divorce?

•  Them need to register marriage as law talk for God to approve-am?

•  Which work God give husband and wife for marriage?

•  God talk say husband and wife for this our time must get children?

•  How Bible fit help my marriage?

•  Bible verses wey talk about marriage

 From the beginning, God make marriage make e dey between one man and one woman. (Genesis 2:24) God no allow make man get plenty wife, make man de marry man, or woman de marry woman and make people wey never marry de live together as husband and wife. (1 Corinthians 6:9; 1 Thessalonians 4:3) Jesus teach im disciples make them follow the way God arrange marriage.​—Mark 10:6-8.

 God de see marriage as relationship wey go dey forever. When man and woman marry, them promise each other say them no go leave each other and them go stay together as long as them dey alive. God expect say them go do as them promise.​—Mark 10:9.

 E get sometimes wey husband and wife fit no dey together. For example, this one fit happen when one of them need to travel go care for family matter wey them no expect. But Bible no support make husband and wife separate because of problem for their marriage. Instead e encourage them to try their best to settle any problem wey them get.​—1 Corinthians 7:10.

 For Bible, the only reason wey fit make husband and wife divorce each other na when one of them put hand for sex wey no clean. (Matthew 19:9) So, if husband and wife decide to separate or divorce each other for any other reason apart from this one, them no dey free as Bible talk to date another person or to marry again.​—Matthew 5:32; 1 Corinthians 7:11.

 God want make Christians de obey government law wey concern marriage. (Titus 3:1) If e dey possible for husband and wife to register their marriage as law talk and them do-am, e go show say them get respect for government and for the way God arrange marriage to last forever. a

•   Wetin two of them need to do. Make husband and wife de treat each other with love and respect. (Ephesians 5:33) Make them de treat each other with love for sex matter and no do anything wey concern sex wey God hate with another person. (1 Corinthians 7:3; Hebrews 13:4) If them get children, na the husband and wife get the work to train their children.​—Proverbs 6:20.

   Bible no talk everything about how them go share the work wey them de do to support their family and house work. Na the two of them go decide which one go good for them.

•   Wetin husband go do. Bible talk say “na husband be head of im wife.” (Ephesians 5:23) This one mean say na im go guide im family and make decision wey im wife and children go gain from.

   E must make sure say them get wetin them need to dey healthy, dey happy and dey close to Jehovah. (1 Timothy 5:8) E go show say e value im wife character and the things wey im wife fit do as e de support-am. E go sofri listen to wetin im wife de talk and how im wife de feel, when e want make decision. (Proverbs 31:​11, 28) Bible talk say husband need to use love do the work wey e get for family.​—Colossians 3:19.

•   Wetin wife go do. Bible talk say “make the wife get deep respect for im husband.” (Ephesians 5:33) God de happy when wife de show respect for the work wey God don give husband.

   Wife get the work to de support im husband as head of the family. E still need to de help im husband so that the husband go fit de make good decision. (Genesis 2:18) Bible really praise wife wey de do the important work wey e get for marriage well.​—Proverbs 31:10.

 No. Before-before, God command some of im servant make them born children. (Genesis 1:28; 9:1) But today no be must for Christians to follow that command. Jesus no ever command im disciples make them get children. Even Jesus disciples no talk say people wey don marry must get children. Na husband and wife go decide whether them go get children.

 Bible get better advice wey fit help husband and wife start their marriage well. Bible advice fit still help husband and wife avoid and solve problem for their marriage.

 Bible advice fit help husband and wife to . . .

•   de show true love.​—1 Corinthians 13:​4-7; Colossians 3:14.

•   de solve problem.​—1 Corinthians 10:24.

•   de listen well.​—James 1:19.

•   de show respect.​—Romans 12:10.

•   de forgive.​—1 Peter 4:8.

•   no leave each other.​—Mark 10:9.

•   dey patient.​—Ephesians 4:​2, 3.

•   de do things together.​—Ecclesiastes 4:9.

•   de do things wey go make their love for each other strong.​—Song of Solomon 8:7.