Money De Cause All Kinds of Wicked Things?
The answer wey Bible give
No. Bible no talk say money bad, and e no talk say money de cause all bad things. Some people de talk say Bible say “na money de cause all bad things” but that one no correct. Wetin Bible really talk na say na “the love of money de cause all bad things.” a—1 Timothy 6:10, King James Version, na we write the word love for thick black color.
Wetin Bible talk about money?
Bible talk say money fit help us when we use-am well, e even talk say e fit “protect” us. (Ecclesiastes 7:12) Bible still talk good about people wey de like to give gift like money.—Proverbs 11:25.
Bible still warn us say make we no put money as the number one thing for our life. E talk say: “Make wuna no love money for wuna life, and make wuna dey okay with wetin wuna get now.” (Hebrews 13:5) From this verse, we learn say make we de use money well and make we no plan to dey rich by all means. Instead, make we dey okay with the things wey we really need for life like food, clothes, and where we go live.—1 Timothy 6:8.
Why Bible warn say make we no love money?
People wey get long throat no go get everlasting life. (Ephesians 5:5) One reason be say, to get long throat be like to worship idol. (Colossians 3:5) Another reason na say, sometimes people wey gey long throat no de follow the better advice from Bible because of wetin they want get. Proverbs 28:20 talk say: “If person dey faithful e go get plenty blessings, but if person de hurry-hurry to get money, e hand no go clean.” They fit even do bad things like to threaten people collect money, to cheat, deceive people collect money, kidnap, or even kill people.
Even if we no do any of this bad things, to love money fit still affect us for bad way. Bible talk say, “people wey want get money by all means go fall for temptation and trap. And they go fall for plenty useless things.”—1 Timothy 6:9.
How we fit gain from the advice wey Bible give about money?
If we no stop to obey God because of money, we go dey happy with ourself, God go dey happy with us, and e go support us. God promise all the people wey de use their heart do wetin e want say: “I no go ever leave you, and I no go ever abandon you.” (Hebrews 13:5, 6) E still tell us say, “if person dey faithful e go get plenty blessings.”—Proverbs 28:20.
a They don still translate this verse as: “The love of money na one of the things wey de cause all kinds of wicked things.”
