No, Bible no teach say Mary na the ‘mother of God’, and e no advice Christians make them worship or make them de honor Mary. a Some things to think about:

•   Mary no ever claim say im be the ‘mother of God’. Bible explain say Mary born “the Son of God,” no be God e born.​—Mark 1:1; Luke 1:​32.

•   Jesus Christ no ever talk say Mary na the ‘mother of God’ or say make them de give-am special honor. In fact, e correct one woman wey praise Mary because na im born Jesus. Jesus tell-am say: “No, instead, na people wey de hear the word of God and de do-am go happy!”​—Luke 11:​27, 28.

•   The word “Mother of God” and “Theotokos” (person wey born God) no dey inside Bible.

•   The word, “Queen of Heaven” for Bible no de talk about Mary, but e de talk about one lie-lie god wey Israel people worship when them leave Jehovah. (Jeremiah 44:​15-​19) The “Queen of Heaven” fit be Ishtar (Astarte), one woman god for Babylon.

•   Christians for apostle time no worship Mary and them no give-am any special honor. One person wey de write about wetin don happen for past talk say, Christians for the apostle time “no de give special honor to anything or anybody or give special honor to Mary wey go make-am be like say them de worship woman god.”​—In Quest of the Jewish Mary.

•    Bible talk say God no get beginning. (Psalm 90:1, 2; Isaiah 40:28) Since God no get beginning, e no go fit get mama. Another thing be say, Mary for no fit carry God for im belle; Bible make-am clear say even the heavens no go fit contain God.​—1 Kings 8:27.

Mary Na Mother of Jesus No Be the “Mother of God”

  Mary na Jew person, and e come from King David family line. (Luke 3:23-31) God bless Mary well-well because of im faith and as e de worship-am. (Luke 1:28) God choose Mary to be Jesus mama. (Luke 1:31, 35) Mary still get other children wey e born for im husband Joseph.​—Mark 6:⁠3.

  Even though say Bible show say Mary come be Jesus disciple, Bible no later talk many things about Mary.​—Acts 1:14.