Na true say Bible no be science textbook, but when e talk about science e de always dey correct. Make we see some examples to show say science and Bible agree and say some things wey Bible talk about science dey different from wetin people believe the time wey they write Bible.

•   The stars and the earth get beginning. (Genesis 1:1) But this one dey different from the lie-lie stories wey people de talk that time. They talk say nobody make the earth and the stars but say e just come by chance. People for Babylon believe say, the gods wey make the stars and the earth come from two big water. Other stories wey they talk na say the earth and the stars come from one big egg.

•   Na the laws for nature de control the stars and things for this earth, no be some small-small gods. (Job 38:33; Jeremiah 33:25) People de talk lie-lie stories for the world say people no fit do anything to stop the gods when the gods want do their wicked things.

•   Nothing de hold this earth, e just dey empty space. (Job 26:7) Before-before plenty people for the world believe say the earth flat and na one giant or one big animal, like buffalo or turtle de carry the earth.

•   Water from rivers and springs come from water wey don dry from ocean and sea go up for sky and fall back to the earth as rain, snow, or hail. (Job 36:27, 28; Ecclesiastes 1:7; Isaiah 55:10; Amos 9:6) Before-before, Greek people de think say water for river come from underground water, and this idea continue until around 300 years ago.

•   The mountains wey we de see today dey for under water before. (Psalm 104:6, 8) But this one dey different from the lie-lie stories wey people de talk say na the gods make the mountains the way them be.

•   When we dey clean, this one de make our body strong. The law wey God give Israel people talk say, make them de wash their hands after they touch dead body, make them de keep people with bad sickness wey fit spread far from other people, and when they shit make they cover-am well. (Leviticus 11:28; 13:1-5; Deuteronomy 23:13) But this one dey different from the kind medicine wey Egypt people de use that time. Them de mix shit and other things to treat wound.

 Wetin we see for inside Bible show say the answer na no. Make we see some things wey no correct wey people feel say Bible talk about science:

 Wrong idea: Bible talk say talk say God make this earth and the stars for just six days wey each day na 24 hours.

 The truth: Bible no talk the exact time wey God make earth and stars. (Genesis 1:1) And too, the days wey Genesis chapter 1 talk about na period of time wey we no really know how long the time be. The truth na say, Bible call all this days wey God use make heaven and earth one “day.”—Genesis 2:4.

 Wrong idea: Bible talk say God make plants first before e make the sun, so that the plants go use the sun make their food.—Genesis 1:11, 16.

 The truth: Bible talk say God make the sun, one of the stars for “heaven” before e make plants. (Genesis 1:1) Light from the sun shine reach this earth for the first “day,” or period of time wey God make things. For the third “day” wey God make things, the cloud clear for the sky, the sun shine well and the light reach the earth to help plants make their food. (Genesis 1:3-5, 12, 13) Na later they start to see the sun from the earth.—Genesis 1:16.

 Wrong idea: Bible talk say the sun de move go round the earth.

 The truth: Ecclesiastes 1:5 talk say: “The sun de come up, and the sun de go down; then e go rush go back to the place wey e go come up again.” But this verse de talk about how person de see the sun from the earth, e go be like say the sun de move. Even today, people de talk say “sun de come up” and “sun de go down,” but they still know say na the earth de move go round the sun.

 Wrong idea: Bible talk say the earth dey flat.

 The truth: When Bible talk about “the end of the earth,” e mean “the whole earth.” So, e no mean say the earth flat or say e get corner. (Acts 1:8; footnote) Na the same thing too, when Bible talk about “the four corners of the earth,” e mean the whole earth. Today, person fit use North, South, East, and West to talk about the whole earth.—Isaiah 11:12; Luke 13:29.

 Wrong idea: Bible talk say if you measure circle round, e go be the same if person measure-am straight from one side to the other side three times, but the correct one na pi (π), or about 3.1416.

 The truth: The measurement of the “big basin from metal” wey 1 Kings 7:23 and 2 Chronicles 4:2 talk about de show say if they measure the bowl straight from one side to the other side, e go be 10 cubits and if they “measure-am go round na 30 cubits.” E fit be say na this numbers near pass to the exact number wey they measure. And e fit still be say this numbers de show wetin person go get if e measure the basin for inside and for outside.