Yes! Bible come from “God wey de comfort people wey dey sad.” (2 Corinthians 7:6) Even though say Bible no be textbook for mental problem, e don help plenty people wey be want kill theirself. The advice wey dey inside Bible na something wey you fit follow and e fit help you too.

•  Which advice wey you fit follow dey inside Bible?

•  Bible tell us about people wey be want kill theirself?

•  Which verse them for Bible fit help you if e dey your mind to kill yourself?

•  What if your friend talk say, “I want die”?

•  What if I don try to kill myself before?

• ● Talk how you de feel.

   See wetin Bible talk: “Real friend de show love all the time, and na brother wey you fit trust when problem dey.”—Proverbs 17:17.

   Wetin e mean: We need people to help us when things de worry us for mind.

   If you no tell other people wetin de worry you for mind, that bad feeling fit pass wetin you fit control. But if you tell other people how you de feel, e fit help you think good about your problem and make-am no over worry you.

   Try this one: Talk to person today, e fit be your family person or friend wey you trust. a You fit still write down how you de feel.

• ● Go meet doctor for help.

   See wetin Bible talk: “People wey dey strong no need doctor, but na sick people need-am.”—Matthew 9:12.

   Wetin e mean: When we de sick, e good make we go meet doctor wey fit treat us.

   When person de feel like say make e kill e self, e fit be sign of mental sickness. E just be like normal sickness, person wey get-am no need to shame. They fit treat this kind sickness.

   Try this one: No waste time to go meet doctor wey de treat this kind sickness.

• ● Remember say God care for you.

   See wetin Bible talk: “People de sell five sparrow for two coins wey the value small, no be so? But God no de forget any of them. . . . Make wuna no fear; wuna get value pass plenty sparrow.”—Luke 12:6, 7.

   Wetin e mean: You dey special to God.

   You fit de feel say people no care about you, but God understand how you de feel. E really care about you even if life don tire you. Psalm 51:17 talk say, “O God, you no go leave person wey de feel say e own don finish.” God want make you dey alive because e love you.

   Try this one: Check different things for Bible wey prove say God love you. For example, check chapter 24 of this book Draw Close to Jehovah. Na book wey you fit use to study Bible.

• ● Pray to God.

   See wetin Bible talk: “Make wuna throw all wuna problem give [God], because e de care for wuna.”—1 Peter 5:7.

   Wetin e mean: God want make you pray about how you de really feel and wetin de worry you for mind.

   God fit give you peace of mind and the power to endure your problem. (Philippians 4:6, 7, 13) Na like this God de help people when they pray make e help them.—Psalm 55:22.

   Try this one: Pray to God today. Use e name, Jehovah, and tell God how you de feel. (Psalm 83:18) Beg God make e help you endure.

• ● Think about wetin Bible talk about how the future go be.

   See wetin Bible talk: “We get this hope, e be like anchor wey de hold our life. E dey sure and e no de shake.”—Hebrews 6:19, footnote.

   Wetin e mean: The way you de feel fit de go up and down like boat wey dey ontop river wey no settle. But the hope wey Bible give fit calm your heart.

   That hope no be dream, but na wetin God don promise, say e go remove wetin de cause our pain.—Revelation 21:4.

   Try this one: Read lesson 5 for the brochure God Get Good News for You! to learn more about the hope wey dey Bible.

• ● Do something wey you de like to do.

   See wetin Bible talk: “When person de always get joy for e heart, that one na good medicine.”—Proverbs 17:22.

   Wetin e mean: If we de do things wey go make us happy, e fit help us feel better.

   Try this one: Do something wey you de like to do. For example, you fit listen to music wey go make you feel good, read something wey go encourage you, or do any other thing wey you de like to do. Another thing wey go really make you happy na to do things to help other people, even if na small thing you do for them.—Acts 20:35.

• ● Take care of your body.

   See wetin Bible talk: “To do exercise de give . . . gain for body.”—1 Timothy 4:8.

   Wetin e mean: We go gain when we do exercise, sleep well and chop better food.

   Try this one: One kind of exercise na to de waka really fast. You fit do this one, even if na for just 15 minutes.

• ● Remember say the way we de feel and other things for life fit change.

   See wetin Bible talk: “Wuna no know how wuna life go be tomorrow.”—James 4:14.

   Wetin e mean: Problem wey de worry you, even the one wey e be like e no get solution, fit no last for long time.

   Even if e be like say hope no dey today, things fit change tomorrow. Because of that one, think of how you fit endure. (2 Corinthians 4:8) Your problem fit change after some time, but if you kill yourself, you no fit change that one.

   Try this one: Read Bible story about people wey life don tire sotey e hungry them to die, and see how for the end, their life change and e better pass as e be dey. And many times, their life de change for ways wey they no even expect. Make we see some examples.

 Yes. Bible tell us about some people wey talk something wey fit mean say, “I want die.” God no vex for them, but instead e help them. E fit help you too.

Elijah

•  ● Who e be? Elijah na prophet and e get strong heart. But sometimes, e de tire for life too. James 5:17 talk say, “Elijah na person with feeling like us.”

•  ● Why e want die? E get one time for Elijah life, wey e feel like say e dey alone, e feel like say e no dey important and e de fear. So e beg Jehovah say, “Kill me now, O Jehovah.”—1 Kings 19:4.

•  ● Wetin help Elijah? Elijah tell God how e de really feel. How God encourage Elijah? E make Elijah see say e care about how e de feel and e show-am E power. God still help Elijah know say e still dey important and e give Elijah better person wey e go work with and wey go really support-am.

•  ▸ Read about Elijah: 1 Kings 19:2-18.

Job

•  ● Who e be? Job na rich man. E get wife and children. All of them de worship the true God.

•  ● Why e want die? Plenty bad things start to happen for Job life. E lose all e property. All e children die at once. E get one serious sickness wey de really pain. Another thing na say, some people lie and blame Job say na e cause all e problems. Job talk say: “My life don tire me; I no want continue to live.”—Job 7:16.

•  ● Wetin help Job? Job pray to God and e talk to other people. (Job 10:1-3) Job friend Elihu really show pity and e encourage Job to see e problems for different way. The one wey dey important pass na say, Job accept the advice and help wey come from God.

•  ▸ Read about Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moses

•  ● Who e be? Moses na leader for Israel for Bible time and na faithful prophet.

•  ● Why e want die? Moses get plenty work to do, some people de always talk bad about the things wey e do, and that one really make Moses tire. So with the pain wey dey e heart, e tell God say: “Abeg just kill me now.”—Numbers 11:11, 15.

•  ● Wetin help Moses? Moses tell God how e de feel. God help Moses reduce the work wey e de do so that e no go too tire.

•  ▸ Read about Moses: Numbers 11:4-6, 10-17.