God command Israel people to give tithe, a or one tenth of wetin they get each year as part of wetin them de do to support true worship. God tell them say: “Make you no ever fail to give one tenth [“tithe,” King James Version] of everything wey your seed produce for your farm every year.”​—Deuteronomy 14:⁠22.

 The command to pay tithe na part of the law wey God give the nation of Israel through Moses. Since Christians no dey under this law, they no need to pay tithe. (Colossians 2:​13, 14) Instead, each Christian fit give money “as e decide for e heart, make e no complain or do-am by force, because God love person wey de glad as e de give.”​—2 Corinthians 9:⁠7.

•  Wetin Bible talk about to pay tithe for “Old Testament”

•  Wetin Bible talk about to pay tithe for “New Testament”

 For the part of the Bible wey them de call old testament, they mention the word “tithe” for plenty verses. Plenty of this verses de talk about the time wey Israel people de follow the law wey God give them through Moses. But some verses dey wey they mention the word “tithe,” before God give that law.

Before the Law Wey God Give Israel People Through Moses

 The first person for Bible wey pay tithe na Abram (Abraham). (Genesis 14:​18-20; Hebrews 7:⁠4) E be like say Abram do this one just one time when e give gift to one man wey be king and priest of Salem. Bible no talk say Abraham or e children pay tithe again.

 The second person wey Bible talk say pay tithe na the grand pikin of Abraham, Jacob. E promise say if God bless-am, e go give God “one tenth of everything” wey e get. (Genesis 28:​20-22) Some people talk say, e fit be say Jacob sacrifice animals to pay this tithe. Even though say Jacob promise to pay this tithe, e no force e family say they must pay.

When Israel People De Follow the Law Wey God Give Them Through Moses

 They command Israel people to pay tithe to support their worship of Jehovah.

•   The tithe wey Israel people de pay de care for the priests and other Levites, so that they go fit work full-time to help people worship God because they no get land to do farm work. (Numbers 18:​20, 21) The Levites wey no be priests collect tithe from the people and give the best of ‘one tenth of the one tenth wey they don collect’ to the priests.​—Numbers 18:​26-29.

•   From wetin Bible talk e fit be say, another tithe dey wey people de pay every year wey de help Levites and other Israel people. (Deuteronomy 14:​22, 23) Families for Israel de use this tithe for special festival, and for some other years, them de share wetin they contribute to poor people to help them so that this poor people go fit get wetin they need.​—Deuteronomy 14:​28, 29; 26:⁠12.

 How much Israel people go give? Israel people de give the tenth part of wetin their land de produce every year. (Leviticus 27:30) If they no want give the tenth part of wetin their land produce, they fit give money but they go add small thing join the money wey they give. (Leviticus 27:31) They still command them to give “the tenth part of the bulls and cows and the sheep and goats.”​—Leviticus 27:⁠32.

 If Israel people want use animals pay tithe, they go give the number ten animal wey come out of their cage. Wetin the Law talk na say they no go need to check any animal wey they choose, and they no go fit give money to replace the animal. (Leviticus 27:​32, 33) But they fit use money replace the second tithe wey them de do every year. This one make-am easy for Israel people wey come from far place to come the festival.​—Deuteronomy 14:​25, 26.

 Which time Israel people de pay tithe? Israel people de pay tithe every year. (Deuteronomy 14:22) But for every seventh year, Israel people no go pay tithe. That year na sabbath year, or year of rest, wey Israel people no go plant anything for their farm. (Leviticus 25:​4, 5) Because of this one, they no go pay any tithe. For every third and sixth year for inside this seven years, Israel people go pay the second tithe to poor people and the Levites.​—Deuteronomy 14:​28, 29.

 Wetin them de do to punish person wey no pay tithe? The Law no talk say they go punish anybody wey no pay tithe. The reason why them de pay the tithe na to make God happy. Israel people go tell God say they don pay the tithe and they go beg God to bless them. (Deuteronomy 26:​12-15) If person no pay tithe, God talk say that person de steal from-am.​—Malachi 3:​8, 9.

 E really hard for them to pay the tithe? No. God promise Israel people say, if they pay their tithe e go really bless them and they no go lack anything. (Malachi 3:10) But when Israel people no pay their tithe, they suffer. God stop to bless them, and the priests and Levites start to use the time wey they suppose use help Israel people worship God to get the things wey they need.​—Nehemiah 13:10; Malachi 3:⁠7.

 When Jesus dey this earth, God still want make Israel people de pay tithe. But this one stop after Jesus die.

When Jesus dey this earth

 The part of the Bible wey plenty people de call the New Testament show say Israel people continue to pay tithe when Jesus dey this earth. Jesus gree say they no need to pay tithe, but e no talk well about the leaders for religion because them de make sure say them pay tithe but they “no de obey the important things of the Law like, to judge for correct way, to show pity, and to dey faithful.”​—Matthew 23:⁠23.

After Jesus die

 After Jesus die, servants of God no need to pay tithe. The death of Jesus end the law wey God give Israel people through Moses. Because of this one, people no need to obey the command “to take tithe.”​—Hebrews 7:​5, 18; Ephesians 2:​13-15; Colossians 2:​13, 14.