Bible no mention any law about when person decide to comot belle. But plenty Bible verses tell us about how God de feel about life and even the life of baby inside belle.

 Life na gift from God. (Genesis 9:6; Psalm 36:⁠9) Every life dey important to God, even the life of baby inside belle. So if person decide say e want kill baby inside belle, that one na the same thing as person wey kill another person.

 The law wey God give Israel people talk say: “If two men de fight and they hit woman wey get belle and e born before the time wey e suppose born, if the pikin no die, the person wey hit the woman go pay for the damage wey the husband of the woman go charge-am; and e must pay-am through the judges. But if the pikin die, then you must use life pay for life.”​—Exodus 21:​22, 23. a

•  Which time life de start?

•  God go forgive person wey don comot belle before?

•  E bad to comot belle if the life of the mama or the pikin dey for danger?

 From the time wey pikin just start to form for belle, God de see that pikin as person. Bible don show us plenty times say, for God, the life of baby inside belle don already be person, no be just part of the mama. See some examples wey show say God de see the life of baby inside belle the same as the one wey they don born.

•   Holy spirit direct King David to tell God say: “Your eye even see me when I still de form inside belle.” (Psalm 139:16) God see David as person even before they born David.

•   And too, God know say e get special work for prophet Jeremiah before they born Jeremiah. God tell prophet Jeremiah say: “Before I form you for inside belle, I know you, and before they born you, I don make you holy. I make you prophet to the nations.”​—Jeremiah 1:⁠5.

•   One doctor wey write the Bible book of Luke, use the same word for Greek language to talk about baby wey still dey for belle and baby wey they just born.​—Luke 1:41; 2:​12, 16.

 God fit forgive people wey don comot belle before. If now they understand say to comot belle na serious sin to God, they no need to allow the one wey they don do before make them feel say God no go ever forgive them. Bible talk say: “Jehovah de show mercy and pity . . . As morning dey far from evening, na so e don put our sins far from us.” b (Psalm 103:​8-12) Jehovah go forgive people wey don sin if they repent, even the ones wey don comot belle before.​—Psalm 86:⁠5.

 Because Bible talk say the life of baby inside belle dey important, e go bad to comot belle just because doctor talk say e dey possible say the mama or the pikin no go dey strong for body.

 Sometimes, something fit happen when the mama de born or dey for labor and e be like say the mama or the baby go die. Wetin the husband and wife go do? For this kind situation, na the husband and wife go decide which life they go try to save.