The war of Armageddon na the final war wey governments for this world and God go fight. This governments and people wey de support them dey against God and they no gree obey God. (Psalm 2:2) The war of Armageddon go destroy governments for this world.—Daniel 2:44.

 The word “Armageddon” dey for only one place for Bible, and na for Revelation 16:16. The book of Revelation show say “the kings for the whole earth” go gather “together for the war wey God wey get power pass go fight for e great day” “for one place wey them de call Armageddon for Hebrew language.”—Revelation 16:14.

 Who go fight for Armageddon? Jesus Christ go lead the angels for heaven to fight and win the enemies of God. (Revelation 19:11-16, 19-21) This enemies na people wey dey against God and no de respect God.—Ezekiel 39:7.

 They go fight the war of Armageddon for Middle East? No. They no go fight the war of Armageddon for just one place, instead e go happen for the whole earth.—Jeremiah 25:32-34; Ezekiel 39:17-20.

 Sometimes them de call Armageddon, “Har–Magedon” (Hebrew Har Meghiddohnʹ), e mean “Mountain of Megiddo.” Megiddo na one city wey dey for Israel before. Things wey people write about Megiddo show say, they fight plenty war around that place and you fit read about some of them for Bible. (Judges 5:19, 20; 2 Kings 9:27; 23:29) But Armageddon no fit be just one area near Megiddo that time. Big mountain no dey there, and the area no go contain all the people wey want fight against God. Instead, for Armageddon the governments for this world go gather together to fight against God.

 How the war of Armageddon go be? Na true say we no fit know how God go use e power that time, but before, God don use things like, hailstones, earthquake, heavy rain, fire and sulfur, thunder, and sickness again. God fit use them again. (Job 38:22, 23; Ezekiel 38:19, 22; Habakkuk 3:10, 11; Zechariah 14:12) Some of the enemies of God go really confuse sotey they go kill each other, but they go know say na God de fight against them.—Ezekiel 38:21, 23; Zechariah 14:13.

 Na Armageddon go end this world? Armageddon no go destroy this earth because God don give people this earth to live forever. (Psalm 37:29; 96:10; Ecclesiastes 1:4) So, Armageddon no go destroy everybody, instead e go save “plenty” servants of God.—Revelation 7:9, 14; Psalm 37:34.

 Apart from say for Bible “world” fit mean the earth, sometimes e fit still mean wicked people wey no want obey God. (1 John 2:15-17) So Armageddon go be “the end of the world” or the end of wicked people wey no want obey God.—Matthew 24:3, King James Version.

 When the war of Armageddon go happen? When Jesus de talk about the “great tribulation” wey go end for the war of Armageddon, Jesus talk say: “Nobody know the day or the time wey e go happen, the angels for heaven no know, even the Son, na only the Father know.” (Matthew 24:21, 36) But wetin Bible talk show say, Armageddon go come when Jesus dey around, and Jesus don dey around from 1914.—Matthew 24:37-39.