Baptism na when they dip person inside water and bring the person come out. a Na this one make they baptize Jesus for big river. (Matthew 3:13, 16) Na the same thing happen too when one man from Ethiopia talk say e want baptize when e “reach one place wey plenty water dey.”—Acts 8:36-40.

Wetin e mean to baptize

 Bible talk say baptism be like burial. (Romans 6:4; Colossians 2:12) To baptize with water just be like say person die with the kind life wey e de live before and e don come back with new life as Christian wey don promise to use e life serve God. God don make-am possible for people to get clean conscience if they get faith for the death of Jesus Christ. To gain from this one, person must do some things to fit qualify for baptism and then baptize. (1 Peter 3:21) Na this one make Jesus teach say e disciples must baptize.—Matthew 28:19, 20.

To baptize with water de wash sin comot?

 No. Bible teach say na only the blood of Jesus fit clean us from our sin. (Romans 5:8, 9; 1 John 1:7) If person want gain from wetin Jesus do for us as e die for us, the person must show say e get faith for Jesus, and change the way e de live e life so that e go agree with wetin Jesus teach, and baptize.—Acts 2:38; 3:19.

Wetin be christening?

 The word “christen” and “christening” no dey for Bible. This one na baptism wey some churches de sprinkle or pour water ontop the head of baby to baptize and name the baby.

Bible de teach say make them de baptize babies?

 No, e no teach that one. Baptism na for people wey don old reach to understand and believe “the good news of the Kingdom of God.” (Acts 8:12) Before person baptize e go need to hear the word of God, accept-am, and repent. This one na things wey babies no fit do.—Acts 2:22, 38, 41.

 Bible still talk say God see small children of Christians say them dey holy or clean because of the faith of their papa and mama. (1 Corinthians 7:14) If to say e correct to baptize baby, God for no see them as holy because of the faith of their papa and mama. b

Wrong ideas wey people get about baptism

 Wrong idea: If they no fit dip person inside water to baptize the person, they fit sprinkle or pour water ontop the person.

 The truth: Na inside water all the baptism wey Bible talk about happen. For example, when Philip de baptize the man from Ethiopia, they “go inside the water.” After, “they come out from the water.”—Acts 8:36-39. c

 Wrong idea: Wetin Bible talk show say when them de baptize everybody for the house, them de baptize the baby wey dey the house too. For example, Bible talk about one prison guard for Philippi say: “E baptize with everybody for e family.”—Acts 16:31-34.

 The truth: Wetin Bible talk about how the prison guard become Christian show say, the people wey they baptize understand “the word of Jehovah” and “really dey happy.” (Acts 16:32, 34) This truth wey Bible talk show say, e no dey possible say they baptize babies when them de baptize everybody for the house of the prison guard because, they no fit understand the word of Jehovah.

 Wrong idea: Jesus teach say they suppose baptize babies when e teach say the Kingdom of God na for young children.—Matthew 19:13-15; Mark 10:13-16.

 The truth: Jesus no de talk about baptism when e talk say the Kingdom of God na for young children. Instead, wetin Jesus de teach na say before person go fit enter the Kingdom of God e must be like pikin them. The person must dey humble and dey ready to learn from other people.—Matthew 18:4; Luke 18:16, 17.