Sin na anything wey we think, feel, or do wey no agree with wetin God want. To sin mean say we no obey the law wey God give when we do bad thing or we no do the correct thing as God want. (1 John 3:4; 5:​17) Bible still talk say sin mean when person no do wetin e suppose do. That one mean say e no do the correct thing.​​—James 4:​17.

 For the language wey they first use write Bible, the words wey they use for sin mean “to miss the mark” or the target. For example, one group of soldiers for Israel before be really know how to shoot stone sotey “they no go miss-am.” If they translate this one just as e dey for the language wey they first use write Bible, e go be “they no go sin.” (Judges 20:16) So, to sin mean to miss the mark or the target of wetin God want.

 Since na God make people, e get the right to tell them wetin they go do. (Revelation 4:​11) We go answer God for everything wey we de do.​​—Romans 14:⁠12.

E dey possible make person no sin at all?

 No. Bible talk say “everybody don sin and they no fit reach the glory of God.” (Romans 3:​23; 1 Kings 8:​46; Ecclesiastes 7:​20; 1 John 1:⁠8) Why e be like that?

 The first people for this earth, Adam and Eve, no get sin for their body when God make them. This one na because God make them for e image and them dey perfect. (Genesis 1:​27) But when they no obey God, they no dey perfect again. (Genesis 3:​5, 6, 17-​19) And when they born, they pass sin and mistakes to their children. (Romans 5:​12) As King David for Israel talk, “They born me when I already get sin.”​​—Psalm 51:⁠5.

Some sins worse pass other sins?

 Yes. For example, Bible talk say men of Sodom “really wicked, them de do plenty” bad things and their sin “really heavy.” (Genesis 13:13; 18:20) Make we see things wey fit help us know how heavy sin be.

1.   E dey serious. Bible warn us say make we no put hand for serious sins like to do things about sex wey God hate, to worship idol, to thief, dey drunk, to cheat people, to kill, and to do things with demons. (1 Corinthians 6:​9-​11; Revelation 21:⁠8) Bible talk say this sins dey different from the sins wey person no think about or wey person no plan to do. For example, person fit talk or do something and e pain other people. (Proverbs 12:18; Ephesians 4:​31, 32) Even with that one, Bible tell us say make we no de see some sins say them dey small, because they fit make us do serious sins.​​—Matthew 5:​27, 28.

2.   The reason. Some people de sin but they no know say wetin them de do dey against wetin God want. (Acts 17:30; 1 Timothy 1:​13) Na true say all sin na sin, but Bible talk say this kind sins dey different from the one wey person de sin and e know wetin e de do. (Numbers 15:​30, 31) When person de sin and e know say e de sin, this one show say e get “wicked heart.”​​—Jeremiah 16:⁠12.

3.   The number of times. Bible still talk say when person sin one time, e dey different from the one wey person continue to sin for long time. (1 John 3:​4-8) God go judge people wey de “sin and [they] know wetin [them] de do” even after they don know the correct thing wey God want.​​—Hebrews 10:​26, 27.

 When people don do serious sin, the sin go de really worry them. For example, King David write say: “My mistakes dey ontop my head; like heavy load, they don too much for me to carry.” (Psalm 38:⁠4) But Bible give this hope say: “Make the wicked person leave e wicked way and make bad person stop to think for bad way. Make e come back to Jehovah, e go pity-am, make e come back to our God, because e go open hand to forgive.”​​—Isaiah 55:⁠7.