The holy spirit na the power wey God de use do things. (Micah 3:8; Luke 1:35) God de use e spirit when e send e power to any place to do the things wey e want.—Psalm 104:30; 139:7.

 For Bible, the word “spirit” come from the Hebrew word ruʹach and the Greek word pneuʹma. Plenty times, this word de talk about the power of God, or holy spirit. (Genesis 1:2) But other ways dey wey Bible use this words:

•   Air wey we de breathe.—Habakkuk 2:19; Revelation 13:15.

•   Wind.—Genesis 8:1; John 3:8.

•   The power for inside people and animal wey de help them stay alive.—Job 34:14, 15.

•   The way person de think or feel.—Numbers 14:24.

•   Spirit persons, like God and the angels.—1 Kings 22:21; John 4:24

 This different-different ways wey Bible use the word “spirit” de show say spirit no be wetin person fit see but e de do things wey person fit see. Na the same thing with the spirit of God, “like wind, we no fit see-am, e no get body but e get power.”—An Expository Dictionary of New Testament Words, by W. E. Vine.

 Bible still talk about the holy spirit of God as e “hands” or “fingers.” (Psalm 8:3; 19:1; Luke 11:20; compare Matthew 12:28.) Just the way the person wey de make things de use e hands and fingers to do e work, God don use e spirit to do different-different things like:

•   The heaven and the earth.—Psalm 33:6; Isaiah 66:1, 2.

•   The Bible.—2 Peter 1:20, 21.

•   The miracles wey e servants before-before do and the fine way wey they do their preaching work.—Luke 4:18; Acts 1:8; 1 Corinthians 12:4-11.

•   The fine-fine qualities wey e servants de show.—Galatians 5:22, 23.

The holy spirit no be person

 Since Bible call the spirit of God e “hands,” “fingers,” or “air,” this one show say holy spirit no be person. (Exodus 15:8, 10) Just as person no fit use e hand work if e mind and body no direct-am, na the same thing with holy spirit, e no fit work if God no direct-am (Luke 11:13) Bible talk say holy spirit be like water and e connect the holy spirit with things like faith and to know things. This things wey Bible connect the holy spirit to show say holy spirit no be person.—Isaiah 44:3; Acts 6:5; 2 Corinthians 6:6.

 Bible mention the name of Jehovah God and the name of e Son, Jesus Christ; but no place for Bible mention the name of the holy spirit. (Isaiah 42:8; Luke 1:31) When God show Stephen vision about heaven, Stephen see only two people no be three. Bible talk say: “As holy spirit full e body, e look heaven and see the glory of God and of Jesus as e de stand for the right hand side of God.” (Acts 7:55) The holy spirit na the power wey God use help Stephen to see the vision.

 Wrong idea: The “Holy Ghost,” or holy spirit, na person and na part of the three persons for the teaching say three persons dey inside one God, as 1 John 5:7, 8 talk for the King James version of the Bible.

 The Truth: For the King James version of the Bible for 1 John 5:7, 8, they join “for heaven, the Father, the Word, and the Holy Ghost: and this three na one. And this three de bear witness for the earth.” But people wey de study about Bible don see say no be apostle John write-am and so, e no suppose dey inside Bible. Professor Bruce M. Metzger write say: “E clear say this words na fake and say they no suppose dey for the New Testament.”—A Textual Commentary on the Greek New Testament.

 Wrong idea: Bible talk about holy spirit like say na person, and this one show say holy spirit na person.

 The Truth: Sometimes, Bible de talk about holy spirit like say na person, but this one no mean say holy spirit na person. When Bible de talk about sense, death and sin, e still talk about them like say they be person. (Proverbs 1:20; Romans 5:17, 21) For example, Bible talk say sense get “works” and “children,” and say sin de deceive, de kill and de do longer throat.—Matthew 11:19; Luke 7:35; Romans 7:8, 11.

 Na the same thing apostle John do when e mention wetin Jesus don talk before. E talk say holy spirit na “helper” (paraclete) and e go give proof, guide, talk, hear, preach, praise and receive just as person de do. E use word wey them de use to talk about man when e de talk about that “helper.” (John 16:7-15) E do-am because the Greek word for helper “ (pa·raʹkle·tos) na noun wey them de use for man and this noun de always take pronoun wey them de use for man as them de use-am for the grammar of Greek language. When John de talk about holy spirit, e use the noun pneuʹma wey them de use for things and this noun de go with the pronoun wey them de use for things.—John 14:16, 17.

 Wrong idea: To baptize for the name of the holy spirit na proof say holy spirit na person.

 The Truth: Sometimes, Bible de use “name” to mean power or right. (Deuteronomy 18:5, 19-22; Esther 8:10) This one dey like wetin them de talk for English say “for the name of the law.” This one no mean say law na person. When they baptize person “for the name of” the holy spirit, this one mean say the person agree say na holy spirit be the power wey God de use to do wetin e want.—Matthew 28:19.

 Wrong idea: The apostles of Jesus and other disciples believe say holy spirit na person.

 The Truth: Bible and wetin them write about the things wey happen for Bible time no talk like that. The book Encyclopædia Britannica talk say: “The idea say Holy Spirit na Person . . . come from the Council of Constantinople for ad 381.” By that time, 250 years don pass when the last apostle don die.