To forgive mean to comot the bad thing wey person do us from our mind. For Bible, the Greek word wey them translate as “to forgive” mean “to let something go,” like when person tell another person say make e no pay wetin e de owe. Jesus use this example when e teach e disciples to pray say: “Forgive us our sins, because we self de forgive everybody wey de owe us too.” (Luke 11:4) For the same way, when Jesus talk the story of the slave wey no gree forgive, e talk say to forgive be like when person de cancel wetin another person de owe-am​—Matthew 18:​23-​35.

 When we forgive other people, e mean say we don stop to de vex. E still mean say we no go de expect make the person pay us back for wetin we don lose or wetin we don suffer. Bible teach us say for person to fit really forgive, e must get love wey no de think about only imself, because love “no de keep record of bad thing wey people do-am.”​—1 Corinthians 13:​4, 5.

Wetin to forgive no mean

•   E no mean say wetin the person do wey pain us correct. Bible no support people wey de talk say bad things no really bad or say e dey good.​—Isaiah 5:​20.

•   E no mean say we go de pretend say the person no do us anything at all. God forgive the serious sins wey King David commit, but e no protect-am make e no face the punishment for the things wey e do. God even allow make them write about the sins wey David commit so that we go fit read about them today.​—2 Samuel 12:​9-​13.

•   E no mean say we go allow people treat us anyhow. For example, suppose you borrow person money but e waste-am and no gree pay you back as e promise. E come talk say make you no vex and e really beg you. To forgive-am, you fit decide say you no go vex again or say you no go talk about the matter again and again. Or you fit even decide say make e no pay wetin e de owe again. But you fit still decide say you no go borrow-am any money again.​—Psalm 37:21; Proverbs 14:15; 22:3; Galatians 6:7.

•   E no mean say we go de forgive when we no get better reason to do-am. God no de forgive people wey use open eye or wicked mind commit sin and them no even gree say wetin them do bad, stop to do bad and beg the people wey them offend. (Proverbs 28:13; Acts 26:20; Hebrews 10:26) This kind people wey no gree repent de become God enemy and God no talk say we must forgive people wey e never forgive.​—Psalm 139:​21, 22.

   What if person treat you for bad way and e no gree beg or even gree say wetin e do bad? Bible advice us say: “Stop to vex and troway hot temper.” (Psalm 37:8) Even if you gree say wetin the person do bad, you fit still decide say you no go vex. Trust say God go judge the person. (Hebrews 10:​30, 31) Your mind fit still come down when you remember say time go come when God go comot all the things wey de pain us for heart.​—Isaiah 65:17; Revelation 21:4.

•   E no mean say we go de vex for every small thing wey person do. Sometimes, instead of to de talk say we don forgive wetin person do wey pain us, we fit need to tell ourself truth say, wetin the person do no even reach to make us vex. Bible talk say: “Make you no de vex quick, because na person wey no get sense de vex quick.”​—Ecclesiastes 7:9.

How to forgive person

1.   Remember wetin e mean to forgive. You no de talk say wetin the person do correct, or pretend like say the person no do anything at all​—you just decide to comot-am from your mind.

2.   Remember wetin you go gain if you forgive. If we no de vex or de carry person for mind, e fit help us dey calm, dey strong for body, and we go dey happy. (Proverbs 14:30; Matthew 5:9) Wetin better pass be say when we forgive other people, God go forgive us our own sin too.​—Matthew 6:​14, 15.

3.   De feel for people. All of us de make mistake. (James 3:2) Just as we go like-am when people forgive us, make we too dey ready to forgive other people when them make mistake.​—Matthew 7:​12.

4.   Show say you get better sense. When we get small reason to complain about wetin person do us, we fit follow the advice for Bible wey talk say: “Continue to bear wetin una de do each other.”​—Colossians 3:​13.

5.   No waste time. No waste time to forgive so that you no go allow anything wey go make you continue to vex.​—Ephesians 4:​26, 27.