Women for Bible—Wetin We Fit Learn From Them?

PLAY

Wetin Bible talk?

Bible tell us about many women wey we fit learn better things from the way they live their life. (Romans 15:4; 2 Timothy 3:16, 17) For this article, we go talk about some women for Bible. Many of them na better example for us, but other ones no be better example.—1 Corinthians 10:11; Hebrews 6:⁠12.

Abigail

Who Abigail be? Abigail na the wife of one rich man, the man harsh and e name na Nabal. But Abigail na fine woman wey get sense. E dey humble and e hold God tight.—1 Samuel 25:⁠3.

Wetin Abigail do? Abigail use deep sense avoid problem. Abigail and Nabal be de live for one area where David wey go be Israel king de hide from people wey de pursue-am. As David and e men dey there, they protect Nabal sheep from thief people. But when David send people go meet Nabal to give them food, Nabal insult them and e no gree give them. This one really make David vex! So, David and e men comot to go kill Nabal and all the men for e family.—1 Samuel 25:10-12, 22.

Abigail no waste time to do something, as e hear wetin e husband don do. E give e servant them food to go give David and e men, and e follow them go beg David to show pity. (1 Samuel 25:14-19, 24-31) As David see the things wey Abigail send, the way e dey humble, and hear the better advice wey e give, David know say na God use Abigail stop-am make e no kill person. (1 Samuel 25:32, 33) After some time, Nabal die and David marry Abigail.—1 Samuel 25:37-41.

Wetin we fit learn from Abigail? Abigail no dey proud even though say e fine and e get money. E beg for wetin no be e fault because e want make peace. When e face serious problem, e sofri handle-am well because e get strong heart and e use sense.

▸ If you want know more about Abigail, check the article wey the topic na “She Acted With Discretion.”

Deborah

Who Deborah be? Deborah na woman prophet wey Jehovah use tell Israel people wetin e want make they do. God still use Deborah settle problems among Israel people.—Judges 4:4, 5.

Wetin Deborah do? Deborah wey be woman prophet use strong heart support God people. God direct Deborah to tell Barak make e lead Israel army to fight Canaan people wey be their enemy. (Judges 4:6, 7) When Barak tell Deborah make e follow-am go fight the people, Deborah no fear and e use all e mind follow-am.—Judges 4:8, 9.

After God make Israel people win, Deborah follow write the song wey e and Barak sing. They talk about the things wey happen for the song. For that song, Deborah talk about the thing wey one woman do to help them win Canaan people. This woman get strong heart and e name na Jael.—Judges, chapter 5.

Wetin we fit learn from Deborah? Deborah really get mind to help people, and e get strong heart. E encourage other people to do wetin God like. And when they do-am, e really praise them for wetin they do.

▸ If you want know more about Deborah, check the article wey the topic na “I Arose as a Mother in Israel.”

Delilah

Who Delilah be? Delilah na one woman wey judge Samson for Israel love.—Judges 16:4, 5.

Wetin Delilah do? Delilah collect money from Philistine people so that e go hand over Samson to them. Samson na person wey God de use save Israel from Philistine people that time. Philistine people no fit win Samson because of the power wey e get from God. (Judges 13:⁠5) So because of this one, they want make Delilah help them.

Philistine people bribe Delilah so that e go tell them the secret of Samson power. Delilah collect the money, and after e try many times, e succeed to know the secret of Samson power. (Judges 16:15-17) E tell Philistine people the secret. So, they catch Samson and put-am for prison.—Judges 16:18-21.

Wetin we fit learn from Delilah? Delilah na bad example. Delilah get long throat for money, e allow this bad character make-am deceive servant of Jehovah. E show say na person wey they no fit trust, and e de think only about e self.

Esther

Who Esther be? Esther na Jew woman wey King Ahasuerus for Persia choose to marry, to become e queen.

Wetin Esther do? Queen Esther use e power to save Jew people make they no kill them finish. E find out say the king don give law make they kill all the Jew people wey de live for the land of Persia for one particular day. This wicked thing na the plan of Haman wey get high position for the kingdom. (Esther 3:13-15; 4:1, 5) Mordecai wey be Esther senior cousin, encourage Esther to tell e husband wey be King Ahasuerus about this wicked plan, and Esther risk e life to do-am. (Esther 4:10-16; 7:1-10) King Ahasuerus give Esther and Mordecai another law wey go give Jew people the power to defend theirself. Because of this one, Jew people win their enemies finish.—Esther 8:5-11; 9:16, 17.

Wetin we fit learn from Esther? Queen Esther na better example of person wey get strong heart, wey dey humble and no de do pass e self. (Psalm 31:24; Philippians 2:⁠3) Even as Esther na fine woman and king wife, e still de meet people for advice, and receive help from people. When Esther de talk to e husband about the matter, e talk with respect and e use sense. But, e still talk am as e be. For the time wey Jew people life dey for danger, Esther no fear to show say e be one of them.

▸ If you want know more about Esther, check the article wey the topic na “She Stood Up for God’s People” and “She Acted Wisely, Bravely, and Selflessly.”

Eve

Who Eve be? Eve na the first woman wey God make, and na the first woman wey they talk about for Bible.

Wetin Eve do? Eve no obey one clear command wey God give. Eve dey perfect just like e husband, Adam. God make Eve with the freedom to fit choose wetin e want do, and the power to fit get better character them like love and wisdom. (Genesis 1:27) Eve know say God don tell Adam say, if they chop fruit from one particular tree, they go die. But Satan deceive Eve to believe say e no go die. The truth be say, na cunny way Satan use make Eve believe say e life go better if e no obey God. So, e chop the fruit. And after, e encourage e husband to chop-am too.—Genesis 3:1-6; 1 Timothy 2:⁠14.

Wetin we fit learn from Eve? Eve na bad example about why e no good to continue to think about bad things for our mind. Eve no gree obey wetin God command. E allow long throat to make-am take wetin no be e own.—Genesis 3:6; 1 John 2:⁠16.

Hannah

Who Hannah be? Hannah na the wife of Elkanah and the mama of Samuel. After, this e pikin wey be Samuel become popular prophet for Israel that time.—1 Samuel 1:1, 2, 4-7.

Wetin Hannah do? When Hannah no fit born pikin, e beg Jehovah for help. Hannah husband marry two wife. Elkanah second wife wey e name na Peninnah get children, but Hannah no fit born pikin for long time after e marry. Peninnah really make life hard for Hannah, but Hannah continue to pray to God to make e mind come down. Hannah promise God say if e give-am boy pikin, e go take the boy go tabernacle make e de serve God for there. Tabernacle na tent where Israel people de worship. They fit move this tent to different-different place.—1 Samuel 1:⁠11.

God answer Hannah prayer, and e born Samuel. Hannah do as e promise, e carry Samuel go serve for tabernacle when e still be small boy. (1 Samuel 1:27, 28) Every year, e de make cloth for Samuel and e de go give-am for there. As time dey go, God bless Hannah with five more children, three boys and two girls.—1 Samuel 2:18-21.

Wetin we fit learn from Hannah? Hannah always pray from e heart. Na this one help-am endure e problems. Hannah prayer for 1 Samuel 2:1-10 wey e use thank God really show say e get strong faith for God.

▸ If you want know more about Hannah, check the article wey the topic na “She Opened Her Heart to God in Prayer.”
▸ If you want know more about why God allow one man to marry more than one wife for Israel people that time, check the article wey the topic na “Does God Approve of Polygamy?”

Jael

Who Jael be? Jael na the wife of one man wey no come from Israel. The man name na Heber. Jael support God people with strong heart.

Wetin Jael do? Jael no waste time to decide wetin to do when Sisera wey be the chief of Canaan people army enter e camp. After Israel people win Sisera army for war, Sisera begin find where e go hide and rest. Jael tell Sisera to come hide and rest for e tent. As Sisera de sleep, Jael kill-am.—Judges 4:17-21.

The thing wey Jael do make wetin Deborah be don talk happen. E say: “Na for woman hand Jehovah go surrender Sisera.” (Judges 4:⁠9) Because of wetin Jael do, Bible talk say na e be the “woman wey they go give honor pass among women.”—Judges 5:⁠24.

Wetin we fit learn from Jael? Jael no wait make person tell-am first before e do the right thing, and e get strong heart. The thing wey Jael do show say God fit do anything to make wetin e don talk say go happen to happen.

Jezebel

Who Jezebel be? Jezebel na the wife of Ahab wey be king for Israel. Jezebel no come from Israel and e no de serve Jehovah. Instead, e de worship Baal wey Canaan people de worship.

Wetin Jezebel do? Queen Jezebel like to control people, e dey wicked, and e like fight. E make people begin worship Baal, and put hand for things about sex wey get connection with Baal worship. For the same time, Jezebel try to make people stop to worship Jehovah wey be the true God.—1 Kings 18:4, 13; 19:1-3.

Jezebel lie and kill people to get things wey e want. (1 Kings 21:8-16) As God don talk, they kill Jezebel and they no bury e dead body.—1 Kings 21:23; 2 Kings 9:10, 32-37.

Wetin we fit learn from Jezebel? Jezebel na bad example. E do bad things sotey e ready to do anything just to get wetin e want. Because of this one, they begin use the name Jezebel to represent any woman wey no de shame to do bad thing, wey de put hand for things about sex, wey no de respect authority, and wey no care whether wetin e do bad.

Leah

Who Leah be? Leah na the first wife of Jacob. E junior sister wey e name na Rachel, na Jacob second wife.—Genesis 29:20-29.

Wetin Leah do? Leah born six boys for Jacob. (Ruth 4:11) Na Rachel Jacob be want marry, no be Leah. But their papa wey e name na Laban arrange make Jacob marry Leah instead of Rachel. When Jacob find out say they don deceive-am to marry Leah, e go ask Laban why. Laban talk say, for their culture no be normal thing for junior daughter to first the senior daughter marry. One week after, Jacob marry Rachel.—Genesis 29:26-28.

Jacob love Rachel pass Leah. (Genesis 29:30) Because of this one, Leah de jealous Rachel as Jacob de show Rachel more love and care. God notice how Leah de feel, so e bless Leah with seven children, six boys and one girl.—Genesis 29:⁠31.

Wetin we fit learn from Leah? Leah no tire to pray to God, even though say e de face problem for e family. And e know say e de get help from God. (Genesis 29:32-35; 30:20) The story of Leah make-am clear say to marry more than one wife de bring many problem. But God allow make they marry more than one wife that time. Jehovah law for marriage na say make man no marry pass one woman, and make woman no marry pass one man.—Matthew 19:4-6.

▸ If you want know more about Leah, check the article wey the topic na “Distressed Sisters Who ‘Built the House of Israel.’ ”
▸ If you want know more about why God allow make man marry pass one woman that time, check the article wey the topic na “Does God Approve of Polygamy?”

Martha

Who Martha be? Martha na the sister of Lazarus and Mary, and the three of them live for one village wey the name na Bethany, near Jerusalem.

Wetin Martha do? Martha and Jesus na close friend. Jesus “love Martha and e sister and Lazarus.” (John 11:⁠5) Martha really like to care for people. One time when Jesus visit them, Mary choose to listen to Jesus but Martha de do other work them for house. Martha complain to Jesus say Mary no help-am. Jesus sofri correct the way Martha de think.—Luke 10:38-42.

When Lazarus de sick, Martha and e sister send message to Jesus make e come. They trust say Jesus go fit make their brother well. (John 11:3, 21) But Lazarus die. The thing wey Martha tell Jesus show say Martha believe wetin Bible talk about resurrection. And e trust say Jesus go fit bring e brother come back to life.—John 11:20-27.

Wetin we fit learn from Martha? Martha really work hard to care for people, e use all e heart to accept correction, e no shame to talk about how e de feel, and wetin e believe.

▸ If you want know more about Martha, check the article wey the topic na “I Have Believed.”

Mary (mama of Jesus)

Who Mary be? Mary na young Jew woman. Na virgin e be the time wey e born Jesus. God do miracle and put the life of e Son inside Mary belle.

Wetin Mary do? Mary dey humble and e do wetin God want. Mary and Joseph don agree to marry when one angel appear to-am, and tell-am say e go get belle and born the Messiah wey they don de wait for since. (Luke 1:26-33) E use all e heart agree to do wetin the angel talk. After they born Jesus, Mary still born four boys and at least two girls for Joseph. So, Mary no continue to be virgin. (Matthew 13:55, 56) Even though say Mary get this kind special honor, e no ever want make people praise or treat-am for special way when Jesus still dey for this earth, or when Mary na part of the Christian congregation for apostle their time.

Wetin we fit learn from Mary? Mary get strong faith and e use all e heart to accept the big assignment from God. E sabi Bible well, e be like say Mary quote about 20 different parts of the Bible from the things wey e talk for Luke 1:46-55.

▸ If you want know more about Mary, check the article wey the topic na “What Mary’s Example Can Teach Us.”

Mary (sister of Martha and Lazarus)

Who Mary be? Mary and e brother Lazarus with e sister Martha na close friend of Jesus.

Wetin Mary do? Mary show many times say e value Jesus wey be the Son of God. Mary show faith when e talk say, if to say Jesus dey there, e for don do-am make e brother Lazarus no die, and e dey there when Jesus bring Lazarus back to life. Martha wey be Mary sister no dey happy with Mary when Mary choose to listen to Jesus, instead of to help Martha do house work. But Jesus praise Mary because e put the things about God first for e life.—Luke 10:38-42.

E get one time when Mary show say e really care for Jesus for special way as e pour “oil with fine scent” on top Jesus head and leg. “The oil really cost.” (Matthew 26:6, 7) People wey dey there talk say Mary de waste money. But Jesus support Mary, e talk say: “Anywhere wey they preach this good news for the whole world, they go also talk about this thing wey this woman do to remember-am.”—Matthew 24:14; 26:8-13.

Wetin we fit learn from Mary? Mary get strong faith. E put the worship of Jehovah as the number one thing for e life, instead of other things. E really show say e honor Jesus even though say e spend plenty money to fit do-am.

Mary Magdalene

Who Mary Magdalene be? Mary Magdalene na Jesus disciple and e hold Jesus tight.

Wetin Mary Magdalene do? Mary Magdalene na one of the plenty women wey travel with Jesus and e disciple. E really use e money to care for the things wey they need. (Luke 8:1-3) E no leave Jesus till Jesus complete e preaching work for this earth, and e still dey with Jesus when they kill am. E get the honor to dey among the first people wey see Jesus after God bring Jesus back to life.—John 20:11-18.

Wetin we fit learn from Mary Magdalene? Mary Magdalene really support Jesus preaching work with the things wey e get, and e continue to hold Jesus tight as one of e disciples.

Miriam

Who Miriam be? Miriam na sister of Moses and Aaron. Na the first woman prophet wey Bible talk about.

Wetin Miriam do? As Miriam na woman prophet, e dey among the people wey God use tell other people e message. E really dey popular for Israel. E join the men sing the song when they win, after God don destroy Egypt people army for the Red Sea.—Exodus 15:1, 20, 21.

After some time, Miriam and Aaron talk bad things about Moses. Wetin make them do this one? E dey clear say they fit don dey proud and dey jealous. God ‘de listen,’ and e really give Miriam and Aaron strong correction. (Numbers 12:1-9) So God cause Miriam to get leprosy, maybe because na Miriam start the bad talk wey they talk against Moses. When Moses beg God to heal Miriam, God answer, and e do-am. After e don dey separate for seven days, they allow make e join Israel people for their camp again.—Numbers 12:10-15.

Bible show say Miriam accept the correction. Many years after God talk about the special work wey Miriam get when e remind Israel people say: “I send Moses, Aaron, and Miriam to wuna.”—Micah 6:⁠4.

Wetin we fit learn from Miriam? The story of Miriam show say, God de listen to the things wey e servants de tell each other or de talk about each other. We still learn say if we want make God happy, we no go dey proud or dey jealous. This bad character them fit make us spoil other people good name.

Rachel

Who Rachel be? Rachel na Laban pikin and the wife wey Jacob like pass.

Wetin Rachel do? Rachel marry Jacob and born two sons for Jacob. After, this e sons become part of the family heads of the 12 tribes of Israel. Na when Rachel de take care of e papa sheep e meet e future husband. (Genesis 29:9, 10) Rachel really “fine” pass Leah wey be the senior sister.—Genesis 29:⁠17.

Because of the strong love wey Jacob get for Rachel, e agree to work for seven years so that e go fit marry Rachel. (Genesis 29:18) But Laban deceive Jacob so that e go marry Leah first. Then after, Laban agree make Jacob marry Rachel.—Genesis 29:25-27.

Jacob love Rachel and e two sons pass the way e love Leah and e children. (Genesis 37:3; 44:20, 27-29) Because of this one, the two women no de agree.—Genesis 29:30; 30:1, 15.

Wetin we fit learn from Rachel? Rachel endure serious family problem wey e face, and e no stop to get hope say God go hear e prayer. (Genesis 30:22-24) E story show say to marry more than one wife de cause serious problem for family. Rachel experience show say better sense dey to follow God law about marriage, make one man marry only one wife.—Matthew 19:4-6.

▸ If you want know more about Rachel, check the article wey the topic na “Distressed Sisters Who ‘Built the House of Israel.’ ”
▸ If you want know more about why God allow make e people marry more than one wife that time, check the article wey the topic na “Does God Approve of Polygamy?”

Rahab

Who Rahab be? Rahab na prostitute wey live for the land of Canaan for Jericho. And after, e become worshipper of Jehovah God.

Wetin Rahab do? Rahab hide two Israel people wey they send to go check how the land be. E do this one because e don hear story about how Jehovah wey be the God of Israel save e people from Egypt, and e still save them when Amorite people come attack them.

Rahab help the people wey they send to come check how the land be, and e beg them to save e life and the life of e family when Israel people come destroy Jericho. They agree, but they tell Rahab wetin e must do. E go make sure say e no tell anybody about wetin they come do, e and e family go stay inside the house when Israel people come attack, and e go hang red rope for window to show say na their house. Rahab do everything wey they talk, so Rahab and e family survive when Israel people come take over Jericho.

After, Rahab marry person from Israel, and na from e family line king David and Jesus Christ come from.—Joshua 2:1-24; 6:25; Matthew 1:5, 6, 16.

Wetin we fit learn from Rahab? Bible talk about Rahab as better example of person wey get strong faith. (Hebrews 11:30, 31; James 2:25) The story of Rahab show say God de forgive, and e no de do partial. E de bless the people wey get trust for God no matter who they be?

▸ If you want know more about Rahab, check the article wey the topic na “She Was ‘Declared Righteous by Works.’ ”

Rebekah

Who Rebekah be? Rebekah na the wife of Isaac and the mama of their twins wey their name na Jacob and Esau.

Wetin Rebekah do? Rebekah do wetin God want even when e no easy. When e de fetch water for well, one man talk say make e give-am water to drink. Quick-quick, Rebekah give the man water to drink, and e even talk say e go give all the man camel water to drink. (Genesis 24:15-20) The man na Abraham servant, and e come from far place to find wife for Isaac wey be Abraham pikin. (Genesis 24:2-4) And e still pray make God bless wetin e want do. When e see say Rebekah de work hard and de care for people, e know say God don answer e prayer. This one show say na Rebekah God want make Isaac marry.—Genesis 24:10-14, 21, 27.

When Rebekah hear wetin make Abraham servant come, e agree to go back with the servant and become Isaac wife. (Genesis 24:57-59) After, Rebekah born twins wey be boys. God don show Rebekah say the senior boy wey e name na Esau go serve the junior one wey e name na Jacob. (Genesis 25:23) When Isaac arrange to bless Esau as the first born, Rebekah do some things to make sure say the blessing come to Jacob. E do this one to make wetin God want happen.—Genesis 27:1-17.

Wetin we fit learn from Rebekah? Rebekah know where e fit do reach, e de work hard and e de care for people. Na this better character them make Rebekah succeed as wife, mama, and person wey de worship the true God.

▸ If you want know more about Rebekah, check the article wey the topic na “I Am Willing to Go.”

Ruth

Who Ruth be? Ruth na Moab woman, e leave e country and e gods and start to worship Jehovah for the land of Israel.

Wetin Ruth do? Ruth show special love to Naomi wey be e mother-in-law. Naomi and e husband with their two sons move go Moab because of the serious hunger wey dey for the land of Israel that time. After some time, their sons marry women from Moab. Their name na Ruth and Orpah. As time de go, Naomi husband and e two sons die, so this three women no come get husband again.

After the hunger end for Israel, Naomi decide to go back to Israel. Ruth and Orpah decide to go with Naomi, but Naomi tell them to go back to their family. Orpah agree. (Ruth 1:1-6, 15) But Ruth no gree leave e mother-in-law. E love Naomi, and e want worship Jehovah wey be the God wey Naomi de worship.—Ruth 1:16, 17; 2:⁠11.

Because of the strong love wey Ruth get for Naomi and as e de work hard, this one make Ruth get better name for Bethlehem, the place wey Naomi come from. One rich name wey get land really like the way Ruth de do. And because of this one, e provide food for Ruth and Naomi. The man name na Boaz. (Ruth 2:5-7, 20) After, Boaz marry Ruth, and na the family line of Ruth, King David and Jesus Christ come from.—Matthew 1:5, 6, 16.

Wetin we fit learn from Ruth? Because of the love wey Ruth get for Naomi and Jehovah, e leave e land e family. E work hard, e hold God tight, and e no leave e mother-in-law even when things hard.

▸ If you want know more about Ruth, check the article wey the topic na “Where You Go I Shall Go” and “An Excellent Woman.”

Sarah

Who Sarah be? Sarah na Abraham wife, and the mama of Isaac.

Wetin Sarah do? Sarah leave the better life wey e be de enjoy for the land of Ur because e get faith for the things wey God promise Abraham wey be e husband. Plenty better things full the land of Ur. God tell Abraham to comot for Ur and go Canaan. God promise to bless Abraham and make Abraham become big nation. (Genesis 12:1-5) E fit be say Sarah don pass 60 years that time. From that time, Sarah and e husband start to live for tent and move from one place to another place.

The truth be say, to live for tent no dey safe for Sarah, but e support Abraham as Abraham follow the direction wey God give. (Genesis 12:10, 15) For many years, Sarah no fit born pikin, this one really make Sarah sad. Even with this one, God don promise say e go bless Abraham children them. (Genesis 12:7; 13:15; 15:18; 16:1, 2, 15) As time de go, God promise say Sarah go born pikin for Abraham. And true-true, Sarah born pikin when e don really pass the age wey woman fit born pikin. That time e dey 90 years and e husband dey 100 years. (Genesis 17:17; 21:2-5) The name of the pikin na Isaac.

Wetin we fit learn from Sarah? The example of Sarah teach us say, we fit trust Jehovah everytime, say e go do the things wey e don promise even the ones wey be like say e no dey possible! (Hebrews 11:11) Sarah example as wife show say respect dey important for marriage.—1 Peter 3:5, 6.

▸ If you want know more about Sarah, check the article wey the topic na “What a Beautiful Woman You Are” and “God Called Her ‘Princess.’ ”

Shulammite girl

Who Shulammite girl be? Shulammite girl na one fine girl wey de live for one village, and na the main person wey Bible talk about for the book of Songs of Solomon. Bible no talk e name.

Wetin Shulammite girl do? Shulammite girl no gree leave the shepherd boy wey e love. (Song of Solomon 2:16) The girl fine no be small, and this one make King Solomon like the girl. So e try to use money buy the girl love. (Song of Solomon 7:⁠6) Even though say other people de tell Shulammite girl to choose Solomon, e no gree. E love the shepherd boy and e no gree leave-am.—Song of Solomon 3:5; 7:10; 8:⁠6.

Wetin we fit learn from Shulammite girl? E no de carry shoulder up even though say e fine and people like-am. E love the shepherd boy no be small. And because of this one, e no allow the things wey people talk, to dey popular or money, to comot e mind for the love wey e get for the shepherd boy. E control the feeling wey e get for the shepherd boy, so e no put hand for bad thing.

Wife of Lot

Who wife of Lot be? Bible no talk e name. Bible tell us say e get two girls and e live for the land of Sodom with e family.—Genesis 19:1, 15.

Wetin wife of Lot do? Wife of Lot no gree do one thing wey God command. God don make up e mind to destroy Sodom and the city them wey dey around Sodom because of the serious bad things about sex wey them de do. Because God love Lot and e family, e send two angels to escort them comot from Sodom go where dey safe.—Genesis 18:20; 19:1, 12, 13.

The angels tell Lot and e family say make they run comot from the area, and make they no look back. If they look back they go die. (Genesis 19:17) So the wife of Lot ‘start to look back and turn to pillar of salt.’—Genesis 19:⁠26.

Wetin we fit learn from the wife of Lot? E story show the danger wey dey when we love money and property sotey e make us no obey God. Jesus use the wife of Lot as example to warn us, when e talk say: “Remember the wife of Lot.”—Luke 17:⁠32.