For insect to fit fly, climb or know wetin de happen around-am, e need to dey clean. For example, if those two long thing wey de dey for the head of ant (them de call-am antenna) dey dirty, e go hard for am to know which side e de go, to talk with other ants or to smell things around-am. One man wey e name na Alexander Hackmann de study how animals de behave and e talk say: “You no go ever see insect wey dirty. They don sabi how to use sense remove dirty from their body.”

 Think-am: Hackmann and the people wey e de work with don study how one ant wey e name na carpenter ant (they still de call-am Camponotus rufifemur) de clean e antenna. They notice say if the ant want remove different size of dirty from e antenna, e go bend e leg. E go bend-am like say e want fold-am then e go come de put the antenna one by one for the middle of the leg and drag-am come out. Na so e go de do again and again. Some part of the leg dey rough and hard, and some part de work like comb or brush, and e dey the same size like the hairs for the antenna. The ant go use the rough parts remove the big-big dirty, then e go use the other part wey be like comb to remove the small-small dirty. E go still use the part wey be like brush to remove any tiny-tiny dirty. Na so e go de remove all the dirty, from the big-big ones, go reach even the tiny-tiny ones wey e hard to see.

 See how carpenter ant de clean e antenna

 Hackmann and e team believe say some companies wey de produce things fit copy the way ants de clean their antenna. For example, people wey de produce some kind machines wey de work with electric or battery, fit copy this style to make sure say some part of the machines de always dey clean, especially the parts wey go fit spoil quick if any dirty touch-am.

 Wetin you think? The part of the carpenter ant leg wey de clean the antenna well so, e just appear by e self, or they make-am?