The first day wey you start to form for your mama belle, you start your life as one small cell wey them de call zygote. The cell small well-well sotey, ordinary eye fit no see-am. Even with this one, after about nine months, them born you as baby wey all im body don form complete. That one cell start to plenty and form more than 200 type of cell with different-different shape and size, and wey de do different-different work.

 Think-am: Zygote de divide imself into two and share im DNA with the new cell. The other cells wey form, go repeat the same process plenty times. When e first happen, all the cells de resemble each other well-well. For inside their DNA, them get all the command wey go help them form all type of cell wey the body need to form well.

 One week after pikin don form, the cells go begin do two different type of work. Some of the cell go become embryo (pikin wey never form finish), the other cells go become placenta and other things wey the embryo need to grow.

 By the time e reach three weeks, the cells of the embryo go arrange to form three parts wey dey ontop each other. Small-small the cells wey dey ontop go form nerve, brain, mouth, skin wey de cover the body, and other cells. The cells wey dey the middle go form blood, bones, kidneys, muscles, and other important things. The cells wey dey under, go form lungs, bladder, and most of the things wey de help body digest food.

 From the day wey the pikin start to form till them born-am, some cells de move from one part of the embryo go another part. Some de move by theirself, but some de move together. Other cells go come together to form something wey flat or them go fold to form something wey be like rope or form something wey get plenty hole. For this one to fit happen, all the cells go need to cooperate to fit work well. For example, e get where e go reach, the cells wey form something wey flat, go coil together to form small-small things wey be like pipe. All this one de happen the same time for different-different part of the embryo. The things wey be like pipe go start to long and go different-different part, then them go connect together to form wetin de carry important things to different part of the body.

 By the time them born the pikin wey all im body de okay, the billions of cells wey dey im body don arrange to form the correct type of cell, don dey for the correct place, and de do their work for the correct time.

 Wetin you think? As each cell for body know im work and sabi do-am, e come by imself or na God make-am?