Dolphin de make different-different kind of sharp sound and whistle. When e do this sounds, e go listen to the message from the sound so that e go fit know which direction to follow and know wetin dey for the area. Scientist don study the sound wey bottlenose dolphin (Tursiops truncatus) de do so that they go fit make one special machine to use under water. This machine go fit listen to any sound under water and send information wey scientist go see for computer and know wetin dey around or wetin de happen under water. This one go help solve problems wey technology never solve before.

 Think about this one: Dolphin de use the sound wey e make to find fish even when the fish hide inside sand under water. E still de use the sound to know the difference between fish and rock. Keith Brown na one professor for Heriot-Watt University, for the city of Edinburgh, Scotland. E talk say dolphin fit still “know the difference between containers wey fresh water dey inside, the one wey salt water dey inside, the one wey syrup dey inside, and the one wey crude oil dey inside, even when this things dey far reach ten meters [32.8 ft].” Scientist go like to make machine wey they go fit de use do some of this kind things.

 Researchers don study how dolphin de make sound and hear, and they don try to copy wetin this fish de do. This study don help them to make one machine with special electronic connection and they put-am inside one round pipe. The pipe no long reach one meter (3.3 ft). Them de tie this machine to one special motor wey resemble torpedo (one kind long round bomb wey them de use for water). The machine fit find things like cables or pipeline for under ground inside water, and check whether them dey for good condition. And e fit check this things even when e no touch them. Scientists expect say they go use this technology for petroleum and gas company. The sound wey dolphin de make don really help scientists. The new machine wey them de make go receive information pass the former ones. This one go help make technicians fit put their equipment for the best place for under water, and e go help make they fit see whether anything get problem. For example, they fit know whether the things wey de support their equipment ontop water don de crack or whether any pipeline block.

 Wetin you think? The sound wey bottlenose dolphin get just come out by e self? Or they make-am?