Barnacles and some other things wey de live for inside water de grow for the body of ships. This one de cause big problem for people wey de drive ship ontop water. As this things de grow for the part of the ship wey dey inside water, e de make the ship de slow, and burn plenty fuel. And e go mean say make they take the ship out of the water and clean-am every two years or so. Science people de try to see whether they fit get solution to this problem from some living things wey they don see.

 Think-am: People wey de do research don see one big fish wey get long fin. Them de call-am pilot whale (they still de call-am Globicephala melas). They don notice say this big fish fit clean e self. E get small-small holes for e body, the holes really small sotey even small barnacle wey never mature no fit stay for there. Some gel dey for inside this holes and the gel de kill any small-small germ or dirty like algae or bacteria wey want gum for the body of the fish. As the fish de shed e skin, new gel de come for e body.

 Science people plan to copy the way the skin of pilot whale de clean e self and use-am solve the problem wey ship body de get inside water. Before-before, they don use some kind paint for the body of the ship so that things wey de live inside water no go fit gum for e body. But they don ban this paint because e de kill things wey de live inside water. The new solution wey people wey de do research don get na to use one kind iron net cover the body of the ship. The iron net go get plenty small-small holes and e go de produce some kind chemical wey no fit kill things inside water. When this chemical touch water for sea, e go thick like gel. This gel go come cover the part of the ship wey dey inside water. E fit thick reach 0.7 millimeters [0.03 in.] Then as the gel de wash comot from the body of the ship, e go wash any thing wey don gum for e body comot too. The iron net go come produce new gel to cover the part of the ship wey dey inside water again.

 Some tests wey they don do don show say if them de use this iron net, ships no go de get this kind problem again. And companies wey de work with ships ontop water go really gain from this one because e mean say they no go need to de spend plenty money again to de clean their ship because e de slow or burn plenty fuel.

 Wetin you think? The skin of the pilot whale wey de clean e self just appear by e self? Or they make-am?