Bible talk say: “Jehovah no go ever fail to give anything wey good to people wey de give complete service.” (Psalms 84:11) Wetin e mean to stand well for Jehovah side? E mean say you go live your life for way wey show say you no de break the promise wey you make to Jehovah when you tell-am say, you go use all your life do wetin E want. (Ecclesiastes 5:4, 5) How you fit continue to stand well for Jehovah side after you baptize?

For this article

•  Continue to endure problem

•  Continue to fight temptation

•  Continue to put body for Jehovah work

 Bible verse: “We must suffer plenty things before we enter the Kingdom of God.”—Acts 14:22.

 Wetin e mean: The truth be say Christians go face problems for their life. Some problems wey you go face, like when people de against you or when them de laugh you, go come because you be Christian. Other problem like money wahala or sickness, na wetin de affect everybody.

 Wetin you fit expect: E go get some times wey things go change for your life, and e fit change for way wey you no like. Bible talk say bad things fit happen to anybody—whether na Christian or no be Christian.—Ecclesiastes 9:11.

 Wetin you fit do: Since you know say problem go come, you fit prepare for-am. See problem as chance for you to make your faith for Jehovah strong more-more and to show say you really trust-am. (James 1:2, 3) As time de go, you go de feel as apostle Paul feel when e talk say: “For everything, I de get the power wey I need from God wey de give me power.”—Philippians 4:13.

 See wetin you fit do: Learn about Joseph. You fit read about-am for Genesis chapters 37 and 39 go reach 41. Think about this questions: Which problem Joseph face wey e no expect, and how e handle the problem? How Jehovah help-am?

 You need more help?

•   Read:

   “How Can I Deal With Tragedy?”

   “How Resilient Am I?”

   “How to Deal With Change”

•   Download:

   “When a Parent is Sick”

 Bible verse: “Each person de face test when the thing wey e want, don de tempt-am and de hungry-am.”—James 1:14.

 Wetin e mean: Sometimes, things wey our body want de tempt all of us. But if we no control-am, e fit make us do wetin bad.

 Wetin you fit expect: After you baptize, the things wey your body want go still tempt you. (2 Peter 2:18) Temptation to put hand for sex before you marry fit even come.

 Wetin you fit do: Make up your mind now—before the temptation come—say you no go allow the things wey your body want push you to make bad decision. Remember, Jesus talk say: “Nobody fit be slave for two oga.” (Matthew 6:24) You fit choose who your master go be. Make e be Jehovah. No matter how temptation fit strong reach, you fit choose to fight-am.—Galatians 5:16.

 See wetin you fit do: Know where you for strong and where you dey weak. Choose friends wey go help you get better character. Run from people, place, and any situation wey fit make-am hard for you to do wetin good.—Psalm 26:4, 5.

 You need more help?

•   Read:

   “How Can I Resist Temptation?”

   “How Can I Keep My Mind Off Sex?”

   “How to Resist Peer Pressure”

   “You De Make the Way Jehovah De Think Your Own?”

 Bible verse: “Show say una continue to work hard . . . go reach the end. This one go make una no lazy.”—Hebrews 6:11, 12.

 Wetin e mean: Person wey no de put eye for e work well fit slow down for e work and e go come dey lazy.

 Wetin you fit expect: You really dey happy when you baptize and e really de hungry you to do more for Jehovah. You really love Jehovah that time. But after some time, e fit come de hard you to obey Jehovah for everything, and that one fit discourage you and to do more for Jehovah fit no come de hungry you again.—Galatians 5:7.

 Wetin you fit do: Continue to do wetin correct, even if sometimes, e no dey your mind to do-am. (1 Corinthians 9:27) As you de try to do that one, continue to know more about your papa for heaven and de always talk to-am for prayer. Still try make better friendship with people wey really love to serve Jehovah.

 See wetin you fit do: Remember say Jehovah really love you and e ready to help you. If you no de fit put body for Jehovah work sometimes, no feel say Jehovah go de vex for you. Bible talk say: “E de give power to person wey don tire. And e de make person wey don weak, really get power.” (Isaiah 40:29) As time de go, Jehovah go bless you as you de try your best and you go fit de put body for e work well.

 You need more help?

•   Read:

   “Young Ones—Keep Working Out Your Own Salvation”

   “How Can I Make Worship of God Enjoyable?”

•   Watch:

   Wetin Other Young People De Talk—De Best Laif Weh Man Fit Eva Get-am

 The main point na say: If you stand well for Jehovah side, e go really make Jehovah heart glad! (Proverbs 27:11) E go happy say you choose to stand well for e side, and e go give you everything wey you need to fit reject Satan attack.